Kritisismo ug bindikasyon

Sa akong pagsulat niining maong lindog alas 3:45 kagahapon sa hapon, walay ni usa ka tulo sa ulan ang mobubo sa alimpulo sa mga partisipante ug misaksi sa Sinulog Festival 2023 diha sa South Road Properties.

Hinuon haring adlaw ang mipatigbabaw sa SRP lukop na sa tibuok dakbayan sa Sugbo. Mora’g gidungog gayud ang pangaliya ni Cebu City Mayor Michael Rama alang sa usa ka maayong lakat sa panahon atol sa Sinulog.

Ang sitwasyon kagahapon sukwahi sa nangaging mga adlaw nga pulos pag-ulan ang atong nasinati dinhi sa Sugbo. Miresulta kini sa grabeng kalapok sa venue diin ipahigayon ang grand competition sa Sinulog.

Kini ang hinungdan ngano nga miani og grabe nga mga pagbatikos si Rama ug ang lokal nga kagamhanan sa dakbayan. Daghan ang nagyawyaw nganong ibalhin pa man kuno gikan sa naandang benyu ang maong festival.

Gani, hasta si Gobernadora Gwendolyn Garcia ang misakay usab sa isyu. Grabe niyang pagbabag sa lakang pagbalhin sa benyu sa Sinulog, hinungdan nga iyang gi-pulled out ang partisipasyon sa tanang contingent sa probinsiya.

Apan dakong sayop si Garcia ug kadtong nagpatuong mga propeta. Haring adlaw ang mipatigbabaw sa benyu atol sa Sinulog. Sa akong pagsulat niini, wala ko makadungog og ni usa ka partisipante o manan-away nga natugsaw sa lapok.

Instead unta nga motabang aron nga mamahimong successful ang maong festival, mibiya na hinuon ang gobernadora ug ang probinsiya, hinungdan nga nawala na hinuon ang essence sa pagpahinungod sa Señor Sto. Niño.

Dili kini sa pagdapig ni Rama ug sa lokal nga kagamhanan sa dakbayan sa Sugbo. Apan sa akong nakita, mora og na-vindicated sila sa ilang insistence sa SRP isip benyu sa Sinulog Festival. Kini kon ang dagan sa panahon kagahapon ang basihan.