EDITORYAL - Importante ang police visibility

Nakahasol ug makahasol pa gyud sa umaabot nga mga adlaw kining mga posts sa social media bahin anang mga kidnappings.

Samtang didto sa Luzon adunay mga insidenteng sama niini, dinhi sa Sugbu way opisyal nga natala ang kapolisan nga samang insidente ning buwana.

Apan duna hinuoy mga nag post nga dunay nahitabong pagpangdagit o suway nga pagpangdagit sa Cebu City, apan way naabot nga samanh report diha sa kapolisan.

Duha ray posibilidad nga rason, mahadlok modangop sa otoridad ang pamilya sa “gidagit” tungod ba kaha sa bahad sa “kidnappers” o dakong binuang lang kini sa mga way lingaw nga mga netizens.

Apan matinuod man kini o binuang lamang, angay kining duha sulbaron sa mga otoridad kay pareho mang nakahasi sa hunahuna sa publiko.

Kung tinuod, kinahanglang imbestigahon, sulbaron aron mahatagan og hustisya ang mga biktima.

Kung binuang ra ang posts, maayong patagmon pinaagi sa pagsilot ang mga nagbuhat niini subay sa gimando sa balaod kay kini nakaalarma, nakapahadlok ug nagmugna ug eskandalo sa publiko.

Apan bisan tinuod pa o dili, makapakalma gyud sa hunahuna sa publiko ang presensiya kanunay sa kapolisan diha sa kadalanan.

Inay nga magpundo sa mga opisina o police stations ang mga polis nga way gitrabaho, maayo pang I deploy sila sa kadalanan aron makatabang sa pagbantay.

Naghatag kini og kasigurohan ug kaluwasan sa publiko gikan sa mga dautang elemento Usa pa, ang ilang presensya makapaduhaduha sab sa uban nga maghimo og dautan.