Theme song ni kap: “help yourself”

Gipa-esplikar karon sa Manila City Hall ang usa ka barangay chairman sa Tondo ngano nga adunay 29 ka tawo nga sakop sa iyang panimalay ang natala sa listahan sa mga tawo nga makadawat sa ayuda gikan sa gobyerno. 

Nipatigbabaw tingale sa iyang kasing-kasing ug hunahuna ang panultihon nga, “Charity begins at home”. Niining panahon sa krisis, angay-angay lang unta kay tanan man nanginahanglan. 

Mora’g theme song ni Kapitan ang awit ni Tom Jones nga “Help Yourself”. Pagkatoytoy!

Mora’g rayna-rayna

Segun sa balita, sugdan na sa Dakbayan sa Mandaue ang ikaduhang hugna sa pagpanghatag og relief goods ngadto sa tanang mga lumolupyo sa dakbayan.

Matud pa ni Mayor Jonas Cortes, ni’ng higayona, tanan na ang mahatagan, dili lang mga indigent kon dili apil usab ang mga arangan og kahimtang. 

Pangutana sa akong amigo nga taga-Labogon, “Tawgon na diay’g ikaduhang hugna ang pagpanghatag nga wa pa man gani silay nadawat nga hinabang sukad sa una?” 

Mora diay kuno’g “Rayna-Rayna” nga unahon pagtawag ang Second kay sa First.  Hala no!

Wala’y “common sin” nga driver

Gidakop sa kapolisan ang usa ka driver diha sa checkpoint sa Mabolo, Cebu City human giingon nga nakiglalis ug nanghagad ug sinumbagay sa nagbantay nga polis. 

Nalimot tingale ang driver nga ang dala niya nga quarantine pass dili maghimo kaniya nga mas hawod pa sa mga polis.

Labaw na nga dili kini makapahimo kaniya nga kublan ug dili usab makapa-immune niya sa kiha. 

Matud pa sa akong silingan, “Way ‘Common Sin’ ni’ng tawhana”. Saoonz!

Pula ang kolor, dili berde

Gilugakan na karon sa Estados Unidos ang mga lagda nga nagpugong sa mga “bayot” sa pagdonate sa ilang dugo ni’ng panahon sa COVID crisis.

Sa unang panahon, ang mga bayot dili tugotan nga mohatag ug dugo sa tibuok nilang kinabuhi.  

 Tingale napamatuda-an na nga dili makadaut sa panglawas ang dugo sa bayot ug nga parehas ra usab ang kolor sa ilang dugo sa uban’g katawhan: Pula ra gihapon og dili Berde.  Madahaaan!

Pisikal, dili spirituwal ang nausab

Sa unang higayon, ipahigayon ug saolugon sa Katolikong Simbahan ang Dominggo sa Lukay ug uban pa’ng liturgical services pinaagi sa mga social media platforms.   Tungod sa COVID, nausab ang pamaagi sa pagpadayag sa atong pagtoo. 

Apan matud pa sa akong higala, pisikal nga pagpadayag ra ang nausab; ang spirituwal nga aspeto nagpabilin nga wala maatiman. 

Daghan kuno gihapon ang mga maut, tikasan, mapahimuslanon ug palabi-labihon taliwala sa krisis.  Sakit nga kamatuoran!