Atong responsibilidad

Pagsuwat ko niining lindog duna nay 64 ka mga kompirmadong kaso sa coronavirus disease (COVID-19) dinhi sa nasud. Ug basi sa talaan sa Department of Health, unom na ka mga pasyente ang namatay tungod sa maong sakit.

Ang World Health Organization (WHO) mideklarar na niini nga usa ka pandemic, buot ipasabot nga lapad na ang pagkuyanap sa sakit.

Mokapin na sa usa ka gatos ka mga nasud sa tibuok kalibutan ang apektado. Dunay 145,810 na ka mga kaso sa tibuok kalibutan kagahapon ug posibleng nadugangan pa kini karong adlawa.

Niining maong gidaghanon 5, 436  kon siete porsiento ang namatay. Ug duna nay 72,531 ang hingpit nga naayo gikan sa maong balatian.  Sa mga natakbuyan sa sakit 6,082 kon nueve porsiento lang ang kritikal ang 91 porsiento kon 61,761 pulos mild infection lang ang nahiaguman.

Nagpabiling ang China maoy dunay labing daghang kaso sanglit didto man sa Wuhan City nagsugod ang maong sakit. Kun basihan ang gidaghanon sa mga kaso, ang Pilipinas anaa lang sa top 50. Ang Pilipinas dunay population nga kapin sa 108 million sigun sa 2019 census.

Kun imong tan-awon ang gidaghanon sa mga kaso dinhi sa nasud labihan ra gyud ka gamay niini kun itandi sa gidaghanon sa mga molupyo.

Sa laktod dili ta angayang malisang ug mag-panic nga mosamput na hinuon paghimo og sayop nga mga disisyon.

Wala ko nag-ingon nga dili ta mabalaka, importante pa gihapon ang kanunay nga pag-amping batok sa sakit.

Apan way rason aron kita magpanic nga hangtud ang tanang baligya nga alcohol ug facemask sa tindahan imong pakyawon bisan sobra sa imong panginahanglan.

Ang kalisang ug pagpanic dili makatabang, hinuon imong gisugba ang imong kaugalingon ngadto sa mga tawong mapahimuslanon.

Ang labing epektibong hinagiban batok sa sakit mao ang pagsiguro nga kanunay'ng limpiyo. Busa batasana ang pagpanghunaw sa imong mga kamot gamit ang sabon ug tubig o ba kaha alcohol.

Ug niining panahon sa krisis importante ang hustong kasayuran. Ayaw og tuo sa dili lihitimo nga tinubdan sa balita ug likayi ang pagpakatap sa mga mini nga impormasyon tungod kay ato kining responsibilidad pagtabang sa gobyerno.