Respeto sa Pedestrian

Upat ka mga tawo apil na ang tulo ka mga tinun-an sa elementary ang gidaro sa taxi kansang driver nakatulog.

Ang nakaparat kay ang mga biktima misubay mismo sa pedestrian lane nga gituyo gyud alang sa mga lumalabang.

Usa sa mga biktima ang na comatose karon sa pribadong tambalanan tungod sa ka grabeng danyos nga iyang nahiaguman.

Luoy kaayo ang bata sanglit wala gyud intawon silay ikasarang nga ibayad sa tambalanan maong dugay intawon naatiman. Ang nahitabo nagpakita kon unsa ka walay respeto ang mga driver sa pedestrian lane kay bisan anaa na magsubay ang mga biktima sa lane nga alang kanila.Walay disiplina ang mga driver dili man tanan apan kadaghanan gyud, gani ako mismo kadaghan na makasuway nga sirbatohan og sakyanan bisan nagsubay ko sa pedestrian lane.

Arogante ug walay pakialam sa lagda basta makaagi lang sila, kusog ra ba kaayo ang dagan sa ilang sakyanan.

Kung makaligis ra ba, mamasangil dayon nga wala kabantay. mamahid og salaod aron makalingkawas sa legal nga tulubagon.

Dili naman siguro angay nga ihungit ang saktong pamatasan ug disiplina.

Dili gyud makabaton og disiplina ang usa ka motorista kun tuyuon gyud niya ang pagpabadlong.

Yano ra mab ni nga hisgutanan: Tanan ta dunay espasyo ug katungod sa dalan. Kinahanglan lang ta makamao kun asa magsugod  ang atong responsibilidad ug asa kutob ang atong kagawasan.

Samtang alang usab sa mga tawo kun adunay agianan nga mas luwas angayan nga maneguro gyud sama sa Pardo nga aduna untay skywalk apan mas pilion gyud ang mas dali apan peligro. Daghan kaayo ang atong mga skywalk nga dili gyud gamiton kay kapoy kuno ang pagsaka kanaug niini.

Bahala na og kapoy basta luwas kita tungod kay kinabuhi nato ang nakataya kong makig patentero kita sa mga sakyanan.

Unta kita magpakabana sa mga lagda dili gyud unta kita masugamak sa mga panghitabo sama niini.

Kung ang Disiplina ug Respeto magkuyog seguro hapsay ra gyud kaayo.