Ayaw pagsalig ni bisan kinsa

Ang makalilisang nga pagpatay sa usa ka balikbayan gikan sa Sweden didto sa Barangay Gun-ob, Dakbayan sa Lapu-Lapu usa ka sakit nga kamatuoran nga angay hinuktokan sa matag usa kanato. Dili lang kini usa ka ordinaryong krimen sa kadalanan, kondili usa ka makapahugno nga kaso sa pagbudhi. Ang tawo nga gihatagan og trabaho, panginabuhian, ug pagsalig, ang caretaker mismo sa apartment mao pa ang nahimong utok sa kamatayon sa iyang amo.

Tungod lang sa kahadlok nga masakpan ang iyang pagpangdispalko og kwarta, mas gipili niya ang pagpatay kaysa atubangon ang iyang tulubagon. Kini nga hitabo nagpadayag sa duha ka masakit nga reyalidad sa atong katilingban karon. Una, ang makahadlok nga gahom sa kahakog ug kalisod nga makapabuta sa konsensiya sa tawo.

Sa pag-angkon sa gunman nga natintal siya sa kinse mil pesos tungod sa panginahanglan sa iyang mga anak, makita nato kon giunsa paggamit ang kakabos isip rason sa paghimo og dautan.  Apan bisan unsa pa ka dako ang panginahanglan, dili gayud kini igong rason aron kutloon ang kinabuhi sa usa ka inosenteng tawo. Ang kinse mil pesos dali rang mahurot, apan ang kinabuhi nga nakalas dili na mabalik, ug ang prisohan maoy nagpaabot sa mga nagbuhat niini. Ikaduha, kini nagsilbing kusog nga pahimangno alang sa tanan, ilabi na sa atong mga kaigsoonang OFW ug balikbayan nga naghago sa gawas sa nasud. Kasagaran, tungod sa kamingaw ug sa tinguha nga makatabang, dali ra kaayo kita mosalig sa atong mga kaila, silingan, o bisan sa mga paryente kon magtukod og negosyo o magpatukod og balay dinhi sa Pilipinas.  Apan ang sobrang pagsalig nga walay saktong pagbantay maoy kasagarang hinungdan sa pagpanglimbong. Kon ang usa ka tawo makakita og higayon nga makapanghilabot og kwarta tungod kay walay nagsusi, magsugod na ang tentasyon. Ug kon magkagrabe na ang problema ug hapit na masakpan, ang uban makahimo na og mga desperado ug bayolenteng lakang aron lang makalingkawas. Angay usab natong hatagan og pasidungog ang kapulisan sa Dakbayan sa Lapu-Lapu tungod sa ilang paspas nga lihok. Sulod lang sa wala pay dose oras, nadakpan na ang gunman ug ang mastermind, ug napasakaan dayon sila og kasong murder. Sama sa nahitabo sa usa ka kaso sa Cebu City diin nadakpan usab dayon sulod sa 24 oras ang suspek, kini nagpakita nga kon seryoso ug abtik ang atong mga tinugyanan sa balaod, dili makalingkawas ang mga kriminal.

Ang paspas nga hustisya makatabang sa paghupay sa kasakit sa pamilya sa biktima ug makahatag og kahadlok sa uban nga nagplano og dautan. Apan bisan pa sa kaabtik sa atong kapulisan, ang pinakamaayong panagang batok sa krimen mao gihapon ang pag-amping sa matag indibidwal. Ang pagkamabinantayon dili nagpasabot nga kita dautan og hunahuna sa atong isigkatawo; nagpasabot lang kini nga kita maalamon ug nagmahal sa atong kinabuhi ug hinagoan. Sa panahon karon, kinahanglan nga ang pagsalig ubanan kanunay og klarong kasabutan, resibo, ug regular nga pagsusi. Sa katapusan, mas maayo na ang magmatngon ug maglikay kaysa magbasol kon ulahi na ang tanan.