Dili garantiya

Lig-on ang sukaranan sa argumento ni Dean Jonathan Capanas nga dili garantiya ang taas nga buhis ug ubang mga bayranan sa serbisyo sa dakbayan sa Sugbo aron makatigom og dugang kwarta ang syudad alang sa panginahanglan niini pagpundo sa mga proyekto ug ubang gastohan paghatod sa batakang  serbisyo ngadto sa publiko.

Atol sa public hearing sa giproponer nga amendment sa Revenue Code sa syudad niadtong miaging semana, gipahimangnoan ni Capanas ang mga opisyal sa syudad nga ang bisan unsang umento sa buhis ug bayranan posibling makaapekto sa mga patigayon nga karon nag-antos sa taas nga inflation  ug hulga sa El Nino. Husto si Capanas nga ang taas nga bayranan wala magpasabot nga mosaka sab ang revenue collection sa dakbayan tungod kay posibling daghan sa mga patigayon ang mapugos pagpanirado. Iyang gitambagan ang mga opisyal sa syudad nga tun-an og maayo kun gikinahanglan ba gyud ang umento sa buhis ug mga bayranan. Si Capanas, kinsa usa usab ka Certified Public Accountant, nagkanayon nga angayang tan-awon una ang ubang mga pamaagi pagkolekta og dugang pundo nga wala kinahanglana ang  umento sa buhis. Pananglitan, ang pagpalambo sa collection efficiency sa syudad. Unahon pag-atiman sa teasurer’s office ang pagkolekta sa mga patigayon nga wala makabayad sa ilang obligasyon sa syudad.

Ako hinuong nabantayan nga kasagaran sa mga konsehal way gusto nga umentohan ang bayranan sa buhis ug mga permits. Gipaabot na hinuon ni’ng daan nga ingon niini ang mamahimong reaksiyon sa mga konsehal labi pa kadtong gustong magpahumot sa mga botante.

Sa dagan sa public hearing, masabot nga dakong hagit alang ni City Treasurer Emma Villarete unsaon pagkumbinsir dili lang ang publiko kun dili lakip na ang iyang mga kaubang opisyal sa dakbayan aron mosugot sa iyang giduso nga umento.

Dili igo ang rason nga karaan na ang Revenue Code sa dakbayan ug nagkinahanglan na og upgrade tungod kay 1993 pa kini gipatuman. Ang mas importanteng pangutana ug angayang kahatagan og makatagbaw nga tubag ni Villarete, unsay garantiya sa publiko nga mapalambo ang batakang serbisyo sama sa regular nga pagkolekta sa basura kon umentohan ang bayranan?

Daghan sa akong mga kailang negosyante miingon nga dili ra gyud unta sila magsapayan kun dunay usbaw sa bayranan kun efficient lang ang serbisyo sa dakbayan.