Pagdaug batok drugas

Sigun sa datus nga gihatag sa gobyerno, moabot og 178 ka libo ang mga nalambigit sa gidili nga drugas ang mitahan sa ilang kaugalingon ngadto sa kapolisan lukop nasud. Sa maong gidaghanon, 22 ka libo ang gikan sa Central Visayas diin ang siyam (9) ka libo niini ang nagagikan sa dakbayan sa Sugbo.

Sa 178 ka libo nga mitahan, 112 ka libo kanila ang tiggamitan og gidili nga drugas ug ning maong gidaghanon usa lamang ka porsiyento grabi na gayod ka adik.

 Aron mapaligon ang kampanya sa gobyerno batok sa suliran sa gidili nga drugas ang Philippine Drug Enforcement Agency (PDEA) milusad og mga programa sama sa Barangay Drug Clearing Program diin sentro niini mao ang paghakot og mga kasayoran gikan sa barangay mahitungod sa kalihokan sa mga nalambigit sa gidili nga drugas.

Laing programa nga gipasiugdahan sa PDEA mao ang Jail Drug Clearing Program, Preventive Education Community Involvement ug Balay Silangan.

Ang tumong sa Preventive Education Community Involvement mao pagpalapad sa gipakatap na nga kasayoran mahitungod sa dautan nga epekto sa paggamit og gidili nga drugas ngadto sa lawas ug ugma sa tawo.

 Tumong usab sa Jail Drug Clearing Program ang pagpugong sa pagsulod sa gidili nga drugas sa mga prisohan ug paglimpyo niini niadtong mga nasudlan na.

Ang Balay Silangan mao ang giandam nga puy-anan niadtong mga dili high value target nga drug personalities ug moboluntaryo sa pag usab sa iyang kaugalingon pinaagi sa pag undang na sa pag gamit sa gidili nga drugas.

Ang mosulod sa Balay Silangan ipaubos sa mga seminars ug pagbansay sa lain-laing matang sa panginabuhi diin kadtong makahuman na niini gitagan-an na og trabaho.

 Ang Danao City sa lalawigan sa Sugbo mao ang pinaka-una nga lokal nga kagamhanan nga nakatukod og Balay Silangan ug naka pa gradwar na kini og napulog lima ka mga drug pushers nga mibiya na sa illegal nilang matang sa panginabuhi.

Mangagni unta sila sa ilang mga kauban kaniadto aron madugangan ang ilang gidaghan.