Tinubdan sa chicharon
Nabanhaw ang mga pagduda nga gikan sa China ang nabantog nga chicharon sa Carcar City human nabutyag nga way bisan usa nga tigluto og chicharon ang nagkuha sa ilang suplay sa panit gikan sa higanteng baboyan sa silingang lungsod sa San Fernando nga gironda sa niaging semana.
Matud ni Rosalio Aguanta, operations manager sa Multifarms Agro-Industrial Development Corporation, tag-iya sa pito ka ektaryang baboyan nga may 10,000 ka ulo, nga way bisan usa sa 2,000 ka libo ka baboy nga ilang mabaligya matag buwan nga maadto sa Carcar.
* * *
Nahibaw-an ni Aguanta gikan sa iyang kaila nga mga negosyante sa Carcar nga kuwang ang lokal nga suplay sa baboy alang sa inadlaw nila nga panginahanglan tungod sa kahimalitan sa ilang chicharon ngadto sa lokal ug langyaw nga mga turista. Maong nidangop sila sa pagpangompra gikan sa ubang kanasuran.
May laing rason nga gihatag ang National Meat Inspection Service (NMIS): Mas barato ang imported nga karneng baboy ug busa mas dako ang ginansiya kun maoy himuon nga chicharon sa Carcar ug gamiton sa kinaham nga mga putahe sa mga pungku-pungko sa Metro Cebu.
* * *
Unang nakapahibawo namo nga China ang tinubdan sa 80% sa chicharon sa Carcar mao si Erwin Goc-ong, presidente sa Cebu Market Vendors Cooperative (CEMVEDCO) sa Carbon Public Market sa Dakbayan sa Sugbo, 12 ka tuig nang nilabay.
Nihatag og dugang detalye ang NMIS niadtong 2011: Sa way paghisgot pila ang gikan sa China, 29,540 ka tonelada nga karne gikan sa ubang kanasuran ang nidunggo sa mga pantalan sa Sugbo ug Central Visayas matag tuig.
* * *
Apan gidid-an ang importasyon sa karneng baboy gikan sa China sugod niadtong Septiyembre sa niaging tuig human natino nga natakdan sa African swine fever (ASF). Gawas sa China, gi-ban sab ang mga karneng baboy gikan sa Belgium, Hungary, Latvia, Poland, Romania, Russia ug Ukraine.
Wa kong kaduaw sa Carcar karong bag-o pagsusi kun naapektahan ba ang ilang suplay sa panit sa baboy nga gipabukalan sa tubig nga may asin ug lamas sa wa pa giprito sa mantika aron mahimong chicharon. Nagduda kong di sila apil sa maguol kun makandadohan gyud ang hugawan nga baboyan sa San Fernando.
* * *
- Latest
