EDITORYAL - Taronga inyong trabaho

Nakapasar sa botohay sa House Justice Committee ang pagpaamendar sa Juvenile Justice Act kon Republic Act 10630. Buot nga paubsan ang pangidaron sa criminal liability sa kabataan gikan sa 15 anyos ngadto na sa 9-anyos.

Mao kini ang gipangayo sa kapolisan kay kuno nagkabata na ang mga kriminal ug ang uban gigamit sa mga sindikato ilabi na sa ilegal nga drugas.

May kamatuoran ang pamahayag sa kapolisan apan wala nagpasabot nga tanang mga krimen binuhatan na karon sa mga bata.

Gani kun basehan ang pamahayag ni Senador Francis “Kiko” Pangilinan kinsa maoy nangamahan sa RA10630 (nga gustong paamendahan), gikan mismo sa rekord sa Philippine National Police niadtong tuig 2013 kini nag-ingon nga wala kaabot og dos porsiyento sa tanang mga nahitabong krimen sa tibuok nasud binuhatan sa mga bata.

Sa ato pa, 98 porsiyento gihapon sa mga kriminal niadtong tuiga mga hamtong na. Karong 2019, 98 porsiyento na sa mga krimen binuhatan sa mga bata?

Kung dili kini maoy nahitabo karon solusyon angay pa bang paubsan ang criminal liability sa mga kabataan? Mao ra ni ang makapahuot sa mga prisohan diin nagdasok ang mga gahi nga mga kriminal.

Ang mga prisohan nga imbes makareporma sa nakasala nakapahimo na hinuon kanilang mat-an nga mga kriminal.  Unya isagol ang mga nag-edad og 9-anyos, mas mangtas pa unya sila ini og gawas.

Ang Juvenile Justice Act gituyo alang sa proteksyon sa mga kabataan aron paghatag kanila og panahon nga magbag-o ug mamahimong kapuslan sa nasud.

Dili tanang bata gipakatawo nga maayog kahimtang ang mga ginikanan.

Kun nagamit man ang mga bata sa mga krimen, sala kini sa gobiyerno kay napakyas sila sa ilang trabaho pagpanalipod kanila.

Bisan og paubsan hangtud usa ka tuig ang pangidaron sa ‘criminal liability’ sa mga bata, kun ang gobiyerno dili magtarong sa ilang trabaho pagpanalipod sa kabataan dili momenus ang mga batang magamit sa krimen.