Kalihokan sa fiesta sa Opon

Opisyal na nga gisugdan ang relihiyosong kalihokan sa fiesta sa dakbayan sa Lapu-Lapu pinaagi sa fluvial procession sa imahen sa Nuestra Sra. Vergin dela Regla.

Sama sa naandan gidagsaan kini sa daghan nga mga deboto sa milagrosang patrona sa Opon.

Gikan pa sa nagkadaiyang dapit ang mga mosalmot ilabi na kadtong dunay mga panaad dungan sa pag ampo ug pasalamat.

Hugot nga seguridad ang gipatuman sa kapolisan, Coastguard, Navy, Airforce ug mga force multipliers.  Pipila ka adlaw sa wala pa ang fluvial nagsegi na og pahibalo ang fluvial committee sa gustong mosalmot nga magparehistro sa ilang mga sakayan.

Apan murag gamay ra man ang nagpalista niadtong Biyernes kay ang uban diretso naman lang og apil sa fluvial, mosugat og mosagol.

Naandan matud pa kini sa uban nga mga deboto nga medyo gahi’g ulo nga dili motuman sa lagda.

Hinumdumi nga alang ra kini sa kaayohan sa tanan aron maseguro nga safety sa katawhan.

Mao bitaw na nga milatid gyud og lagda ang komitiba apan ambot ba nganong lisod man alang sa uban ang pagtuman.

Duna man hinooy mga otoridad nga nagbantay apan naa gihapoy makalusot, gawas pa alangan man og abugon o dakpon sila, tugotan nalang gyud.

Apan nakamugna na kini og kabalaka ug kahasol sa nagbantay kanila.

Ang fluvial procession usa lang sa mga dakong kalihokan sa fiesta, duna pay daghan nga bantayanan ilabi na sa mga kalihokan panahon sa gabii nga dagsaan sa mga tawo.

Labaw sa tanan sa adlaw sa besperas ug sa katumanan diin modagsa ang daghang mga deboto.

Unsa mopatigbabaw ang espiritohanong aspeto ug dili ang tawhanon nga pulos na unya sa inom nga mosangpot sa kasamok.