Mga kaayohan sa ‘Cream of Tartar’(2)

* Pag-alibyo sa UTI (urinary tract infections) – Karaan nga pangremedyo kini matud pa sa pagpasabot sa ‘Every Roots’ website, nga epektibo kaayo ang cream of tartar, kay pausbawon niini ang ‘alkaline pH’ sa ihi (urine), aron pagsanta nga dili kapuy-an sa makadaut nga bakterya.

Unsaon paggamit – Pagsagol og 1-1/2 sa kutsarita nga cream of tartar sa usa ka tasang tubig-init, dayon dugangi sa pinuga nga lemon o lime, para sa vitamin-C ini. Unya init-init pa maayong imnon.

* Pahuwas sa adiksyon sa panigarilyo – Ang adik sa druga makadaut sa sistema sa utok, way kalainan sa adik sa sigarilyo makadaut sa baga, gumikan sa nicotine ug sa mga sagol nga 4,000 ka kemikal. Mao nga sagad nila maglisud sa paghunong ning bisyoha, apan makatabang ang cream of tartar sa pagtangtang sa nicotine nga namilit sa baga. Ug tungod ini, di ka na mawili nga magpangita kang mahangol sa baho sa sigarilyo, masayon na ang paghunong ini.

Unsaon ang paggamit – Pagsagol lang og duga sa prutas nga orange sa usa ka basong tubig-init ug dugangi og usa ka kutsaritang cream of tartar. Imnon kini kada gabii sa di pa matulog. Matud pa sa wikihow website, epektibo kini kay malimpyohan ang agianan sa dugo, nga gibalda sa kabaga sa mga hinanib sa nicotine, nga nakapaluya sa  baga. Makatabang sab ni nga palig-onon ang imyun.

* Pahupay sa kabuhi (heartburn) – Igo na ang cream of tartar nga makahupay sa kabuhi, bisag walay medikasyon. Nisugyot ang ‘Home Remedies’ website, nga magsagol og usa ka kutsarita sa cream of tartar ug usa ka kutsarita sa baking soda, nga kutawon sa ½ sa tasang tubig init.

Mahimong imnon sa di pa mamahaw o sa gabii di pa matulog. Moinom ka og usa ka kutsarita niini nga solusyona samtang naghasol pa kanimo ang sintomas sa kabuhi.