Duterte, Roxas ug bugas
Di ni angkunon ni Presidente Rodrigo Duterte. Apan iyang gisunod ang tambag sa iyang higpit nga karibal nga si kanhi Interior ug Local Government Secretary Mar Roxas sa pagsulbad sa krisis sa bugas humay:
Gihimo niyang gawasnon ang importasyon sa bugas humay ni bisan kinsang pribadong negosyante nga di kinahanglan nga mananghid sa National Food Authority (NFA).
Ang sugyot ni Roxas nga gibugalbugalan sa iyang mga tigpamaba apan ila ra diay gihapong gisanong: Dugangan ang imported nga bugas humay ug tangtangon ang wa kinahanglanang mga lagda sa NFA nga makahasol sa importasyon.
* * *
Ang bag-ong lakang giaprobahan sa mga sakop sa gabinete atol sa ilang tigom niadtong Lunes human wa mahinayon sa niaging semana kay nagpahiling ang presidente sa mga doktor sa Cardinal Santos Medical Center sa San Juan City niadtong Miyerkules sa kaadlawon.
Mao ni ilang tubag sa padayong pagburot sa inflation rate, nga maoy sukod sa kapaspas sa pagsulbong sa presyo sa pagkaon ug ubang inadlaw nga mga palaliton, ngadto sa 6.7% sa Septiyembre, sukwahi sa pasalig sa economic managers nga nitibugsok nang presyo sa mga produkto ug serbisyo.
* * *
Mas kusganon ang lakang kay sa unang gisugyot nilang Cabinet Secretary Jun Evasco ug sa economic managers nga ang NFA gihapon ang moduma apan ang pribadong sektor na ang mangompra og bugas humay gikan sa ubang kanasuran.
Hingpit nga balit-ad ang lakang sa gidapigan ni Presidente Duterte nga gipamugos ni kanhi NFA Administrator Jason Aquino nga government-to-government (G2G) importation nga nakapasulbong sa presyo sa tinubdang kanasuran ug nakapaburot pa gyud sa P180 bilyones nga utang sa NFA.
* * *
Wa hinuon mahisguti sa tigum sa gabinete niadtong Lunes unsay panagang nga ipatuman sa gobiyerno alang sa mga mag-uuma kansang panginabuhi maapiki kon magbaha na sa atong kamerkaduhan ang mas baratong imported nga bugas humay (kay mas dagku mang subsidy sa mga mag-uuma gikan sa ilang gobiyerno sa Vietnam, Thailand ug ubang kanasuran).
Kon di maikog si Presidente Duterte, mahimo niyang tun-an ang sumpay nga sugyot ni Roxas:
I-apil ang labing kabus nga mga pamilya sa mga mag-uuma sa conditional cash transfer (CCT) program aron nga matabangan sa pag-atiman sa labing batakan nilang inadlaw nga mga panginahanglan.
* * *
- Latest
