Duterte di mapukan

Kudeta kuno! Na sab? Kinsa ba kanang gustong magkudeta? Ang mga oposisyonista? Ang mga leftist, komunista, rebeldeng military ug uban pang daotang elemento?

Pero yuna, sa di pa kini ninyo buhaton sa Oktubre aron mapahawa si Tatay Digong, may ipangutana lang ko. Kinsa ba ninyo ang may sulondong gibuhat nga nakapaharuhay  sa nag-ilaid nga mga kabos ug nakapahamugaway ning atong nasud nga nabuktot na intawon sa tinrilyon nga utang?

Kinsa ba ninyo ang misunod sa sugo sa Ginoo nga mao ang ‘Higugmaa ang Diyos labaw sa tanan...ug Higugmaa usab ang isigkatawo sama sa imong kaugalingon’?

Kay kon usa ninyo, nagbuhat sa maong sugo, dili na kinahanglan nga magkudeta. Otomatik, nga ikaw ang pilion sa katawhan ug sa Kahitas-an nga maoy ipuli pagpalingkod sa lingkoranan sa Malakanyang, dili isip usa ka hari, kondili, isip usa ka sulogoon.

Hangtod karon, daw pagahidunggan ko gihapon ang atik ni kanhi Pangulong PNoy nga magpunay’g ingon: “Kayo ang boss ko!” Apan makabuwisit! Kay kutob ra siya sa sulti, wala gyud niya buhata.

Dili ba gisugo man nato si Duterte nga ipapayhag ang mga gidiling drugas nga mikatap na sa atong nasod ug ipahunong na ang kurapsiyon nga milunop na sa mga dagkong buhatan sa gobiyerno? Unya, nganong mangasuko man ta kon panggukdon niya ang mga kriminal, diin sagad mosangko ngadto sa kamatayon nga mao man kini ang nakita niyang epektibong paagi aron mahinayhinay’g hipos ang mga daotan?

Kon ikaw, magbinuotan lang, di ka angay mahadlok! Kay ikaw ang giprotektahan sa atong Presidente.

Apan dapat hinumdoman. Si Duterte nakadaog dili sa madyikerong tikas machine.