Kinahanglan ba gyud usbon ang Konstitusyon?

Una sa tanan, adunay nangutana: What’s wrong with the 1987 Constitution? Ang ato karong nahibaw-an mao ang intensified nga tinguha pag-usab sa Konstitusyon.

Apan ang katawhan wala masayod sa kinatibuk-an kon nganong usbon ang Konstitusyon, unsa ang mga provision nga angay’ng usbon … ug ngano?

Sa labing uwahi nga survey, mayoriya sa katawhan supak paghimo’g kausaban sa Batakang Balaod. Nagpasabot nga wala sila masayod sa hingpit sa dinalian nga panginahanglan sa Cha-Cha.

Unsaon man tuod nila pagsabot nganong usbon ang Konstitusyon nga wala man sila’y salabotan unsa ang 1987 Constitution. Atong kutloon kining sinuwat ni MH Yusingco “There are many aspects of the 1987 Constitution of which Filipinos can be proud — for instance, the entrenchment of social justice and human rights in Article XIII.  The 1987 Constitution is the utmost symbol of Philippine democracy.”

Maoy gikahadlokan sa pipila ka tigpaniid nga ang paghimo’g kausaban sa Konstitusyon ipahaom sa mga tinguha ug kagustohan sa mga nagpasiugda niini, ug dili ang kagustohan sa katawhan.

Gisugyot nga himoon ang mga public debates, kinahanglang i-involve ang katawhan mismo sa pagtuki ug pagpasabot mahitungod niining maong mga lakang.

Hinoon, matud sa Constitutional Consultative Committee (ConCom) nga gipangulohan ni kanhi Chief Justice Reynato Puno, nga sa higayon nga ila na nga ipresentar sa publiko ang gilaraw nga mga kausaban sa Konstitusyon, makasabot ug mo-appreciate ra ang katawhan sa panginahanglan sa Cha-Cha ug sa pag-shift ngadto sa Federalismo.

Lagmit mao kini ang mahitabo ug nagkinahanglan kini og intensified nga information campaign, dili kay mag-press release lang, kon dili, atubangon gayud nila, face to face ang taga-barangay.

Una sa tanan, ilang ipasabot unsa ang mga depekto sa 1987 Constitution, ug unsa ang angayan usbon niini, ug labaw sa tanan, ilang ipasabot pag-ayo ang mga bentaha sa Federalismo batok sa sistema karon.

Adunay duha ka dakong revision ang gi-draft ug naaprobahan sa  ConCom nga seguradong magustohan sa katawhan: Ang anti-dynasty ug ang anti-turncoatism.

 Unsaon man nato pagseguro nga makalusot unya kini sa Con-Ass nga kasagaran nila mga turncoats man ug miisip nga family affair ang pagpangatungdanan sa gobiyerno? Nindot ang mga tinguha ug katuyoan sa ConCom, apan, dawaton ba kaha kini sa mga sakop sa Kongreso, sa kahadlok nga tingali’g mahisupak sa ilang mga vested interests?  Lagmit usa kini sa mga hinungdan ngano nga majority sa mga Pinoy supak sa Cha-Cha, kay wala sila’y salig sa Con-Ass.