EDITORYAL - Mag-checkpoint kanunay

Angay na gyud karon nga molihok pag-ayo ang kapolisan aron madakpan na kining mga riding-in-tandem nga responsable sa mga pagpamusil ug nakapatay na og daghang kinabuhi sa lainlaing mga dapit sa Sugbo. Dili gyud maayong tan-awon nga ingon sa naglisud pagsulbad ang kapolisan niining subsob nga mga pagpamusil. Kagahapon, usa ka opisyal sa Bureau of Jail Management and Penology (BJMP) ang gipusil na usab sa mga tawo nga nagsakay og motorsiklo nga mikalit og atake kang Jail Inspector Edwin Sarcon diha nga mopadagan na unta sa iyang sakyanan pagsiga gyud sa “go signal” didto sa eskina V. Rama Avenue ug R. Duterte sa Banawa.

Sama sa gihapon, wala’y nahimo ang kapolisan aron nga madakpan ang mga kriminal nga misutoy sa pag-ikyas luwan sa ilang motorsiklo. Ang nahitabo nga pagpamusil kang Inspector Sarcon kagahapon, nagbilin og tanghaga kon kinsa gayud kining mga riding-in-tandem nga responsable sa pagpamusil.

Sagad gyud sa mga responsable sa mga pagpamusil, bisan na didto sa silingang siyudad sa Lapu-Lapu ug Mandaue, magsakay gayud og motorsiklo. Kini tungod kay paspas ang pagsibat sa mga kriminal kon motorsiklo ang sakyanan, ug makuli na nga sila madakpan sa kapolisan.

Ang bugtong alkontra sa kapolisan batok sa mga riding-in-tandem nga kriminal mao ang paghimo og kanunay’ng checkpoint operations sa adlaw ug gabii, ug susihon ang mga tawo, ilabi na ang pulos mga lalaki nga mag-angkas pagsakay sa motorsiklo nga maoy sagad gihimo sa mga riding-in-tandem nga kriminal.

Lisud usab nga idili ang pagpaangkas sa motor tungod kay mao kini ang yanong sakyanan sa mga kabus, ug sigurado nga daghan ang apektado kon kini ipatuman. Ang bugtong ra gyud nga mahimo sa kapolisan mao ang pagpahigayon og mobile checkpoint operations sa lainlaing mga dapit, aron nga masakpan nila kining mga tawo nga responsable sa sagunson nga mga pagpamusil.