Fire fighting equipment

Pormal na nga nanumpa sa katungdanan isip ika-16th president sa Pilipinas si Pangulong Rodrigo Duterte niadtong udtong tutok sa Hunyo 30.

Sa iyang mensahe sa katawhan, gihatagan niini og gibug-aton ang mga saad niini sa kampanya nga iyahang limpyohan ang gobiyerno sa kurapsyon ug wagtangon ang krimen ug ang naghitak nga ginadiling drugas.

Gani sa wala pa kini pormal nga milingkod, daghan na ang nangasikop ug gipatay nga durugista nga misukol sa mga sakop sa kapolisan.

Isip sakop sa unipormadong han-ay, ang inyong kabomberohan mosuporta sa bag-ong administrasyon aron mapalambo pa ang fire service. Hinaot nga mahatagan usab og pagtagad ang mga panginahanglanon sa atong kabomberohan pinaagi sa pagpalit og mga modernong ekipo ug kahimanan, sama sa mga lig-ong fire trucks, fire ladder ug mga personal protective equipment nga kapuslan kaayo panahon sa pagresponde og sunog.

Sa pikas bahin, nasubo na usab ang mga sakop sa atong kabomberohan sa BFP Region 7, ilabi na ngadto sa Danao City Fire Station kay dili pa lang gyud dugay, dunay nakalas nga kauban namo sa buhat si FO1 Ritche Guanzon nga nadisgrasya sa gimaneho niining motor kaniadto lang Hunyo 28.

Karon, laing sakop na usab sa maong fire station nga si FO2 Jorge Benedict Batiquin  ang  namatay pinaagi gihapon sa pagkadisgrasya sa motorsiklo nga iyang gisakyan. Gani gumikan sa sunod-sunod nga dili maayong panghitabo, dunay gipahigayon nga santos nga misa sa maong fire station ug ilang gipabenditahan aron pagpahawa sa dimalas kun duna man.

* * *

Sa kataposan, akong i-congratulate sila si Mr. and Mrs. Rene Borromeo, ang mga proud parents ni Princess Rene Pearl Borromeo nga bag-o lang nakapasar sa Architecture Licensure Exams nga gipahigayon niadtong Hunyo 24 ug 26, 2016. Congratulations!!!Gikan sa tanang sakop sa Bureau of Fire Protection (BFP) Region 7.