Brgy Yati, Liloan, Cebu

"Akong ireklamo ang ubang PUJ driver paingon sa Liloan kay inig-abot sa Consolacion pakanaugon man nila ang mga pasahero kay dili sila molahos. Apan sa unahan, manawag na sab sila og pasahero padung sa Liloan. Kalapasan man kini sa balaod.”

Brgy Luz, Cebu City

“Hangyuon nako ang among mga opisyal sa barangay nga unta ipaayo na nila ang karsada atbang gyud sa Grand Convention Center kay daghan na kaayo ang nadisgrasya dihang dapita, labi na sa mga motor.”

Brgy Mabolo, Cebu City

“Diha dapit sa Persimon daghan kaayong bata nga magtapok unya manglabay og bato sa mangagi nga mga sakyanan. Daghan na intawon ang naigo nga mga pasahero sa ilang mga gibuhat, maayo unta og maaksiyonan dayon ni sa ubang mga opisyal."

Brgy San Nicolas Proper, Cebu City

“Diri sa among barangay kay wala gyu’y tanod nga madalidali namo’g tawag kun dunay mahitabong gubot. Ang barangay hall wala gyu’y makitang tawo kada adlaw kay magpundok ra sila diha kun panahon sa tingsweldo."

Brgy Maigang, Barili, Cebu

"Kining piggery diri sa among dapit baho kaayo, daghang tawo ang naproblema labi na kun panahon sa adlaw. Kada pangaon gyud namo manampong mi sa ilong, lakip na sa mga bata tungod sa kabaho pero ang among mga opisyal diri wala gyud magpakabana sa problema."

Brgy Apas, Cebu City

“Padayon mi nga nag-antos diri sa Sitio Upper Panabang kay wa’y klarong supply sa tubig ang Spider Water Supply, labi na panahon sa gabii. Kumpleto man unta mi sa bayad pero ngano nga halos dili man paagasan, labi na kaming tulo ka balay."

Brgy Dakit, Bogo City

“Dunay tanod diri sa among baryo nga wala’y duty sa barangay pero sige man lang og dawat sa iyang sweldo. Unta mailisan ning tawhana kay basin daghan ang mosunod sa iyang batasan nga gipasagdan ra.”

Brgy Guadalupe, Cebu City

“Magpasalamat mi kay ang among barangay may brand new na nga fire truck, apan ang nakaparat kay diha’y panahon sa sunog nga wala man kaandar. Unsa, guba dayon? Wa kahay anomaliya niini?"

Brgy Apas, Cebu City

“Ang among kanal diri puno sa mga basura. Kanus-a pa man tawon ni lihokon sa mga opisyal diri sa Sitio Plaza aron dili kuyaw sa sakit ang mga bata.”

Brgy Tayud, Consolacion, Cebu

“Dunay tighimo og Ngohiong diri sa Sitio Pag-utlan nga nakahasol kaayo sa ilang mga silingan kay ang mga hinugas, labi na sa mga hugaw, ari man ipaagay sa karsada maong baho kaayo. Dugay naming reklamo ani pero wala may aksyon.”

Brgy Sta Cruz, Balamban, Cebu

“Naunsa na man ning among barangay nga wala may klaro ang paghipos sa basura? Magduha na ka semana nga nagkatag lang ang mga basura kay wala man panghakota.

Alang sa inyong mga reklamo text lang sa 09062973166