Tungod sa gugma?
Tungod sa iyang dakong gugma ni Philip Winfred Almeria, nga iyang gikahadlokan nga hingpit nang mobiya niya, niangkon si Melissa Londres nga napugos siya pagkawat sa duha pa ka adlaw nga bata gikan sa Vicente Sotto Memorial Medical Center (VSMMC). Nilampos siya. Nakigsulti si Philip niya human nakigbungol sa pila ka buwan, nihangop sa bata nga iyang gipatuong siya ang naghimugso ug mao pay nihingan sa bata nga Phil Winfred.
Gipaila nilang bata sa mga silingan ug mga kauban sa trabaho. Nakaduaw na sa bata ang mga ginikanan ni Melissa. Gihikay na nilang mga dokumento sa barangay hall pagmatuod nga sila ang mga ginikanan. Nagplano na gani si Philip nga mo-resign sa trabaho ug adto padak-on ang bata uban sa iyang mga ginikanan sa Antique.
* * *
Apan nilungtad lang og duha ka adlaw ang bakak ni Melissa. Ang tag-iya sa bay nga ilang giabangan, nga nakamay-ong niya sa CCTV footage sa VSMMC nga gisibya sa TV Patrol Central Visayas, nipatawag ug nisukmat ni Melissa. Mas unang nakabantay ang ubang silingan. Maong 36 ka oras human niya dagita ang bata, natultolan ug nadakpan siya sa kapolisan.
Human niinsistir nga siya’y nagpakatawo sa bata sud sa taxi, nangayo na og pasaylo si Melissa sa mga ginikanan sa bata atol sa Arangkada sa DYAB Abante Pa, Bisaya! gahapon sa buntag. Kun tinud-on pagkiha, di siyang kapiyansa samtang husayon ang kaso ug kun makonbikto mapriso sa tibuok nga kinabuhi.
* * *
Ang ideya nga bata ray makapugong ni Philip mahimong nisantop sa hunahuna ni Melissa siyam ka buwan ang nilabay. Kanus-a pormal nang nakigbuwag si Philip. Niangkon si Melissa nga naatol sab nga wa moabot ang iyang binuwan nga regla.
Matud ni Melissa nagdugo siya pagka Hulyo, nga iyang gihubad nga pagkakuha sa iyang gisabak. Mahimo sang nalangay lang ang iyang regla. Nagpa-ultrasound siya niadtong Nobiyembre. Napamatud-an nga wa siya magsabak. Apan iyang giusab ang resulta, nangaplay og maternity leave nga giaprobahan sab dayon sa gitrabahoang BPO.
* * *
Niadtong Lunes, namalit siya og uniporme sa nurse sa shopping mall sa Colon. Nga gisapaw sa iyang sinina sud sa fitting room. Nag-PUJ siya paingon sa VSMMC. Unang nakasud sa Cebu Puericulture Center and Maternity House (CPCMH) nga gipakaingon niyang kabahin sa VSMMC.
Kay nabalibaran man sa abtik nga mga kawani sa CPCMH, nipadayugdog siya sa VSMMC. Sukwahi sa unang mga pangagpas nga gipahimuslan niya ang kaluag sa seguridad sa luyo, niingon si Melissa nga sa atubangan siya niagi. Gawas nga wa siya pugngi ni pangitai og ID, ang guwardiya pa gyud maoy nigiya niya paingon sa labor room. Ugma, nganong si Prince Niño Celadenia ang iyang napilian ug nganong sayon ra siyang nakagawas sa VSMMC?
- Latest
