Ang sipyat dili sayon

Nasakmit sa Pilipinas ang iyang ikatulo nga korona sa Miss Universe human sa 42 ka tuig pinaagi ni Pia Alonzo Wurtzbach.

Ang korona gisakmit ni Wurtzbach didto sa Las Vegas, Nevada sa nasud sa Amerika. Una nga nakuha sa Pilipinas ang korona kaniadtong 1969 pinaagi ni Gloria Diaz ug ang ikaduha kaniadtong 1973 pinaagi ni Margarita Moran.

Dinhi makaingon ta nga dili gayud mabentahaan ang Pilipinas kun ang hisgotan mao ang kaanyag ug ang kalantip sa hunahuna kay mao man kini ang basehanan sa indigay sa kaanyag sa kalibutan.

Apan ang korona hapit wa makuha ni Wurtzbach diha nga nasipyat ang host sa pageant nga si Steve Harvey sa pagbasa sa pangalan sa mananaug sa indigay sa kaanyag.

Una nga nabasa ni Harvey ang pangalan sa Miss Colombia nga si Ariadna Gutierrez isip Miss Universe. Nakapaso na gani ug nasul-ob na sa Miss Colombia ang korona apan dali nga gibakwi ni Steve Harvey ang una na niyang gipahibawo.

Gitataw ni Harvey nga ang midaug mao gyud si Pia Wurtzbach sa Pilipinas. Tungod sa sipyat nga pagbasa sa card diin nakasuwat ang pangalan sa mananaug nangayo og pasaylo si Steve Harvey sa Miss Colombia and Miss Philippines ug giangkon ang responsibilidad sa nahimo niyang kasaypanan.

Dinhi akong gidayeg si Steve Harvey tungod sa iyang kaisog ug kakalma sa pag-angkon sa nahimo niyang dako nga kasaypanan. Dili sayon ang pagbakwi sa kasaypanan sa ingon adto ka dako nga kalihokan diin halos tanang mata sa kalibutan nagtan-aw ug nakadungog.

Ang host nga si Harvey dili angayan nga kasilagan sa mga taga Colombia ug Pilipinas, ug sa tanan nilang mga dumadapig tungod kay klaro ug tataw kanato nga wala tuyoa sa pagsayop ang pagpahibalo sa mananaug ug sa dakong pagpaubos iyang giangkon ang nahimo niyang dakong kasaypanan.

Inay kay sawayon, angayan pa gani si Steve Harvey nga daygon tungod sa iyang pagka maayo nga host. Maayong Pasko Kaninyong Tanan!