Zero tolerance!

Kini ang approach karon sa simbahang katoliko ngadto sa ilang mga sakop sama sa mga pari nga mapamatud-an nga nakahimo og bug-at nga kalapasan, dili lang sa balaod sa simbahan, kun dili labaw sa tanan sa kinatibuk-ang Constitution, ang fundamental law of the land.

Usa sa mga bug-at nga sala sa mga pari nga dili madawat sa simbahan mao ang krimen nga naglambigit sa pag-abuso sa mga menor de edad.

Apan gipasabot ni Msgr. Joseph Tan, tigpamaba sa Archdiocese of Cebu, nga ang Vatican mismo ang mopahamtang sa zero tolerance policy ug nagpasabot kini sa pagkataktak sa ilang mga sakop isip usa ka pari.

Nahisgotan kini namo ni Msgr. Tan nunot sa mitumaw nga reklamo batok sa usa ka pari sa lungsod sa Aloguinsan nga gipasanginlan nga nangmolestiya sa menor de edad.

Sumala ni Msgr. Tan nga hugtanong gipanghimakak sa pari ang pasangil, apan aron makuha ang kamatuoran, gipaubos na kini karon sa imbestigasyon ug posible'ng ipaubos sa preventive suspension ang pari aron dili makaapekto sa gihimong pakisusi nga gipasiugdahan sa Vicar General nga si Msgr. Rey Pinagunda.

Gipaneguro sa Archdiocese nga ipaagi sa due process ang tanan ug hatagan og higayon ang pari nga makapresentar sa iyang tubag ug mga ebidensya.

Sayon ra man gud ang paghimo og pasangil aron maguba ang dungog sa usa ka tawo busa gikinahanglan nga dili usa nato hukman ang pari sanglit magpabilin siya nga inosente hangtud mapamatud-an nga sad-an sa pasangil kaniya.

Apan kun tinuod man nga nakasala ang pari, nan atong lauman nga tinud-on sa simbahan ang pagpahamtang sa tukma nga silot batok kaniya.

Ang zero tolerance estrikto na nga gipatuman sa simbahan tungod sa daghang reklamo kalabot sa child abuse batok sa ilang mga sakop.