Bulahang Bag-ong Tuig!

Ania na kita sa Bag-ong Tuig ug maoy atong paghandum nga debuwenas ang tuig 2015 alang sa tanan. Human sa daghang mga pagsulay sa nakalabay’ng tuig, atong gipanghinaut nga maayo ang dagan sa atong kinabuhi karong tuiga.

Sa tuig 2014, nakatagamtan kita og dakong mga pagsulay sama usab sa tuig 2013, diin adunay dagkong katalagman ang mihapak sa nasud nga mikalas og liboan ka kinabuhi ug mibanlas sa bilyones nga kantidad sa kabtangan.

Sa nakalabay nga tuig, adunay mabangis nga bagyo nga si Ruby, nga sama ni Yolanda, milatas usab sa tunga-tungang bahin sa nasud. Apan gibuligan kita sa kahitas-an gumikan kay minos nga kadaut ang dala niini. Ug atong ihangad ngadto sa kahitas-an ug iampo nga dili na masubli pa kadtong maong dagkong mga katalagman nga milatos sa atong nasud karong tuiga ug sa katuigan pang manglabay.

Hinuon sa kinatibuk-an, maayo ang dagan sa atong kinabuhi sa nakalabay nga tuig. Kabahin usab sa ekonomiya, padayon ang paglambo sa mga negosyo sa nasud, ilabina dinhi sa Sugbo.

Ug niining pagpuli sa Bag-ong Tuig, manghinaut kita nga mas mobuwelo pa ang ekonomiya sa nasud nga magdala og dugang pang negosyo. Kini aron nga mas daghang trabaho ang mapahimuslan.

Hinuon daan nang napanglantawan sa mga eksperto sa ekonomiya nga padayon nga moasenso ang ekonomiya sa nasud sa sunod pa nga katuigan. Kini gumikan sa maayong klima sa patigayon mugna sa hapsay nga sitwasyon sa pulitika sa nasud.

Bisan dinhi sa Sugbo, mingsulpot ang mga highrise buildings gumikan sa dakong kumpiyansa sa mga magpapatigayon. Gani bisan asa ka mulingi dinhi adunay mga building nga kamulong gipangtukod.

Usa sa nakapalambo sa atong lokal nga ekonomiya mao ang pagdagsang sa mga puhonan sa business process outsourcing sa Sugbo. Tungod sa kadaghan sa mga batan-ong propesyonal dinhi, misulbong gayud ang negosyo sa call center.

Ug sa atong padayong paglawig sa tuig 2015, usa lamang ang atong gihandum. Nga unta mas buligan pa kita sa kahitas-an ug nga mopadayon pa ang pagtuyok sa ligid sa maayong ekonomiya sa nasud.

Niining Year of the Sheep, hinaut nga ang tanan dinhi sa nasud makabaton og pag-asenso. Bulahang Bag-ong Tuig kanatong tanan!