Mr. Barangay

Nakadawat kog suwat gikan sa presidente sa Mandaue  city public school Teachers Association Mr. Edgar  Espina bahin sa iyang panawagan nunot sa pag-abag sa gihimong fund raising activity nga gipasiugdahan sa federation of  parents teachers association sa dakbayan sa Mandaue. Ania ang unod sa iyang panawagan...

By: Edgar Espina - President, MCPSTA

Maayong adlaw kanatong tanan labi na sa kadagkuan sa DepEd Mandaue City Division pinanguluhan ni Dr Virginia C. Zapanta Ed D ang schools division superintendent, mga magtutudlo ug sa mga ginikanan sa dakbayan sa Mandaue. Dako kaayo ang akong pasalamat nga dunay proyekto nga gipasiugdahan ang Federated PTA sa Mandaue City ubos sa pagpangulo ni Mr. Jun Veliganio tungod ug alang sa kaayuhan sa mga bata ug mga magtutudlo nga nagkinahanglan og tabang medical, dental ug optical.

Sila nagpasiugda og "Run & Zumba for a cause 2014" nga gikatakdang himoon karung umaabot nga December 7, 2014 anha sa Cebu International Convention Center kon CICC.

Isip opening salvo usab kini sa "education week celebration" nga motapos unya sa December 12, 2014 anha sa Mandaue City cultural and sports complex. Tumong sa maong fun-filled activity mao ang pagtabang sa mga bata nga dunay problema sa panglawas, labi sa dunay problema sa ngipon ug sa mga bata nga dili kaayo makaklaro sa ilang pagbasa tungod sa problema sa mata. Kini ang labing unang higayon nga dunay grupo nga nagpasiugda sa maong programa nga para nako tukma kaayo sa panahon karun tungod kay daghan ang mga bata nga naapektahan ang ilang inadlaw nga pagtuon tungod sa gihambin nga mga sakit. Kami sa grupo sa mga magtutudlo sa mga public school sa dakbayan sa Mandaue hugtanong misuporta sa ilang proyekto gani hapit kaming tanan moapil sa ilang gikatakdang "run & zumba" kay among nakita ang kamahinungdanon sa ilang katuyuan alang sa mga bata ug sa mga magtutudlo. Mihatag usab kami’g ayuda nga 5mil pesos gikan sa MCPSTA arun idugang sa mga panginahanglan sa Federated PTA labi na alang sa mga giveaways sa mga moapil unya sa Domingo.

Ako nanghinaut nga magpadayon ang kadasig sa grupo sa PTA ni sir jun arun daghan pang mga matabangan unya nga mga bata. Nunot niini ako miawhag sa ubang mga ginikanan sa pag-apil arun mas daghan pa ang matabangan nga mga bata. Mamahimo kamong magparehistro sa mga public school sa Mandaue sa tag 100pesos lang. Duna pa kamoy higayon nga pagparehistro hangtod sa Biyernes December 5, 2014.

Gawas nga makatabang kita financial sa proyekto sa PTA makatabang usab kini sa kahimsog sa mga ginikanan ug mga magtutudlo tungod sa "run & zumba". Tukma usab kini kay dunay memorandum ang kadagkuan sa Department of Education nga nag-awhag namong mga magtutudlo nga moapil gyod sa mga physical fitness arun magpabilin ang among kahimsog ug dili maapektahan ang among pagtudlo ngadto sa mga bata. Daghang salamat....

Alang sa inyong mga reklamo text lang sa 09071678643