Ang laktud nga nagkalayo

Sagad sa atong nahibaloan, basta molaktud kita’g agianan dili ba duol ra – unya ngano nga kining tukion nato karon, ang laktud nagkalayo man?

Hinuon usahay, may mga situwasyon nga salikwaot kaayong paminawon.

Sama sa among nasinati, diha’ng giimbitar kami aron sa pagpresentar sa SSF livelihood program, alang sa fellowship sa Bogo Alliance of Christian Churches, didto sa Ilihan, Tabogon, Northern Cebu. Wa gyud mi kasayuran aning dapita, gawas sa kuyog namo nga maoy nag-imbitar. Dihang sa Mandaue highway na mi, haskang trapika busa nilaktud mi’g agi sa dalan nga nag-ubay sa baybayon nga inig gawas namo, mao na ang munisipyo sa Liloan.

Apan dihang nagsingabot na mi sa nagsangang-dalan paingon sa Tabogon, nisinyas ang kauban namo nga modisilya aron molaktud na sab mi sa maong dapit. Dihang nahiabot mi didto, nasayran nako nga kadtong gilakturan namo mas may gilay-on kining 10 ka kilometros kay sa didto sa lapad nga highway.

Nangutana ko nganong nalaktud, nga nagkalayo man kadto ikompara sa naandan nga biyahe sa highway. Unya gipasabot ko, nga kadtong dalana mas layo tuod apan dali ra makaabot didto, kay wa kaayo’y moagi didtong  dapita.

Wa gyud diay kini kalainan sa atong kinabuhi, kun buot kita makaabot sa makutas nga padulngan sa atong pangandoy.

Bisa’g unsa kini kaduol apan may mga mobabag aron ugtason ka. Pero ang paglaktud pinaagi sa positibong panghunahuna, makatudlo kini’g agianan nga bisa’g may gilay-on pa sa unahan ug palikoliko pa, makaseguro ka gayud nga tukmang makaabot sa imong mga pangandoy. Nga magmalampuson taliwala sa grabeng alantuson sa kinabuhi.