Ang krusada batok drugas ug kurapsyon

Nagsunod-sunod karon ang patay sa mga tawo nga nalambigit sa ginadiling drugas ug ang pagpasaka og kaso niadtong mga tawo nga nalambigit sa kurapsyon. Gawas sa pagpatay, nagsunod-sunod usab ang pagkasikop niadtong mga nagpayuhot og ginadiling drugas ug ang mga imbestigasyon sa nahitabong kurapsyon.

Dinhi sa isla sa Sugbo ang mga kagamhanang lokal nagpasiugda usab og mga kinalit nga drug test ngadto sa ilang mga kawani samtang ang Land Transportation Office ug Land Transportation Franchising and Regulatory Board mihimo usab og kinalit nga drug test ngadto sa mga driver diha mismo sa kadalanan.

Kining tanan kabahin sa kampanya sa nasudnon ug lokal nga kagamhanan batok sa ginadiling drugas ug kurapsyon. Apan asa ba paingon ang kampanya sa kagamhanan batok ning duha ka suliran?

Dili ikalimod nga ang kagaw sa kurapsyon nakasulod ug nakagamot na sa lima ka haligi sa sistima sa hustisya sa nasud (polis, piskaliya, hukmanan, prisohan ug komunidad) ug mao kini ang hinungdan sa paglipang ug paglapad sa suliran sa ginadiling drugas.

Sa dakbayan sa Talisay gipahulipan ni Mayor Johnny V. Delos Reyes ang iyang hepe sa kapolisan tungod sa kapakyas sa paghipos ug pagsumpo sa suliran sa ginadiling drugas ug sugal. Nasayran usab sa mayor nga pipila ka polis sa Talisay ang tiggamitan og ginadiling drugas human makita sa mga tigbalita ang  kagamitan sa paggamit og ginadiling drugas sulod mismo sa ilang patrol car.

Giingon nga ang ginadiling drugas sa dakbayan sa Talisay gipadagan kini sa nagdala sa Code Name nga FS. Si FS ang giingon nga kakompetensiya sa nagdala sa Code Name nga Jaguar nga mao usab ang naghari sa barangay Pasil ug Ermita.

Ang operasyon niining mga tawhana ug si kinsa man kini sila milapad ug midako tungod sa mga tawo nga nagpaluyo kanila. Kun wala ko masayop mga lig-on nga haligi ang gisandigan ani nila ug kasagaran ani nila mga politiko ug mga opisyal sa kapolisan.

*  * *

Happy Birthday ngadto sa among abtik ug bantogang kapitan sa Barangay Quiot Pangkoy Esparis nga nagsaulog sa iyang adlaw nga natawhan karong adlawa. Happy Birthday Kap.