Ang kalisod ug human trafficking sa nasud

Ang dakong tinguha sa paglingkawas sa kalisod sa panginabuhi sa matag pamilya maoy nag-unang hinungdan nga daghan usab ang nahimong biktima sa human trafficking sa nagkadaiyang dapit dinhi sa nasud.

Subay usab kini sa gikataho sa buhatan sa Department of Social Welfare and Development (DSWD) nga nag-ingon nga dinhi sa nasud sa  tuig 2012 maoy ilang natala ang 1,376 nga gidaghanon sa mga nahimong biktima sa human trafficking.

Dugang pa nila nga sa unang semester sa tuig 2013 ang ilang buhatan nakatala usab og 645 ka mga kaso nga maoy hinungdan sa ilang pagpasiugda og adequate recovery and reintegration services ubos usab sa DSWD’s Recovery and Reintegration Programs for Trafficked Persons.

Ang mga dapit dinhi sa nasud nga daghang biktima mao kadtong nagkalisod ang panginabuhi sa mga molupyo human maigo sa baha, bagyo ug uban pang katalagman  nga lisod gayod ang kahimtang sa pagpuyo.

Si DSWD Secretary Corazon Juiliano-Soliman sa iyang pamahayag nagkanayon nga “poverty is one of the main root causes of trafficking.”  Sa panahon sa kalisod sama sa paghambin og balatian ug kagutom sa ilang sakop sa pamilya  maoy dali kaayo nga mabiktima sanglit dali man kaayong madala sa mga illegal recruiters nga makabaton og maayong trabaho ug dako pa ang kitaon niini sama sa pagtrabaho dinhi sa nasud o didto sa abroad.

Dugang pa sa DSWD nga ang kasagaran nga modus operandi sa human traffickers mao ang pagdani sa mga ginikanan nga motugot kini sa minor de edad pa nilang anak nga babaye nga mobiya sa ilang panimalay ug molangyaw ngadto sa dagkong dakbayan dinhi sa nasud ug pasaligan kini nga pasudlon isip katabang ug dako ang suweldo nga madawat niini.

Ang pipila sa mga biktima gitanyagan og trabaho sa gawas sa nasud nga maoy gamiton ang mini nga visa, marriage certificates ug uban pa nga dokumento sa tuyo nga madali ang paggawas sa nasud.