Pahimus sa sakyanan
Usa ko sa unang nanaway ni Mayor Michael Rama dihang namalit ang dakbayan sa Sugbo og mga Toyota Hilux aron ipanghatag sa mga kapitan ug piniling mga konsehal sa barangay nga iyang kaalyado.
Kini tungod sa rason nga ang maong mga sakyanan gamiton lang sa mga kapitan sa personal.
Wala ko masayop sa akong pagpanaway tungod kay wala lang nako mapamatud-ing gigamit lang sa personal kundi lakip na sa illegal.
Ang nahitabo sa kapitan sa barangay Mabini nga si Rey Oybenes lig-on nga pruweba sa pag-usik usik lang gyud sa kwarta natong mga magbubuhis.
Samtang nakab-ot ni Rama ang iyang tumong sa pagpanghaylo sa mga kapitan aron mosuporta niya, nabutang sa alaot ang mga magbubuhis nga nahikawan sa angayan untang serbisyo kun gipalit pa og truck sa basura ang kwarta nga gigamit.
Tiaw mo nga ang sakyanan nga gihatag sa dakbayan gigamit man diay ni Oybenes sa paghimo og krimin.
Si Oybenes, sa wala magpusil sa iyang kaugalingon, nakit-an nga mitambog sa patay'ng lawas sa giingon nga iyang hinigugma nga si Rohama Luage.
Si Oybenes mao say gidudahang mipusil ni Luage tungod sa giingon nga kasuko niini dihang gibuwagan siya sa nauwahi.
Dili kuno gusto makigbuwag si Oybenes ni Luage bisan duna siya’y kaugalingong asawa ug anak.
Pastilan, sa ato pa di layo nga ila sab nga gigamit niadto ang sakyanan sa gobyerno sa ilang kinawatkawat nga panagtagbo.
* * *
Human sa hitabo, ang dakbayan sa Sugbo mosiguro na nga di magamit sa personal ang maong mga sakyanan.
Ang chief of staff ni Rama nga si Phillip Zafra miingon nga ila na nga pintalan og " For Official Use Only" ang mga sakyanan.
Kay ngano motuo og marking ang mga way uwaw nga mga opisyal? Kadaghan ko makakita niining maong mga sakyanan matag weekend diha sa mga mall nga gigamit sa pamilya sa mga opisyal nga murag nakapanag-iya.
Ang angayang buhaton sa city government mao ang pagmando sa Citom nga ipadakop ang mga sakyanan nga giisyu ngadto sa kabarangayan kun masakpang gigamit panahon sa weekend ug holidays.
Kadtong masakpan nga miabusar bawian sa sakyanan ug pasakaan og kaso. Apan ang pangutana makahimo kaha si Rama niini ngadto sa mga kapitan nga iyang nautangan og kabubut-on sa miaging eleksyon?
* * *
- Latest
