EDITORYAL - Parte sa plano sa China

Murag og walay intensyon ang China nga maresolba sa malinawon ug diplomatikong paagi ang kasungian diha sa West Philippine Sea.

Ang unta ilang dugay na kaayong kontrobersyal nga representante dinhi nga si Chinese Ambassador Jing Quan, mura og dili diplomasya ang gustong mahitabo.

Ning bag-ohay lang, namahayag siya nga 'easy win' lang para nila sa China kung gustohon nila gamiton ang kusog batok sa Pilipinas.

Daghang mga magbabalaod ang wala nahimuot ug nasagmuyo ani ug nanawagan nga ipadeklarar nga persona non grata si Jing.

Apan makahibulong nga naay mga magbabalaod nga kusog kaayong mangangkong usa sila ka tinuod nga Pilipino ug nagsige og pasiatab nga mahal nila ang nasud, wala man naningog batok sa China.

Pero imbes nga mokambiyo ug mangayo og pasaylo, mapanghagiton pa si Jing sa pag-ingon nga ipa-persona non grata siya. Ingon niana kadako ang pagsalig ni Jing sa iyang abilidad—dili siya kayang palayason dinhi sa nasud, duna ba siyay gisaligang mobabag?

Ikaduha na kini nga pagpanghagit ni Jing, una niadtong nagkatinubagay sila ni PCG Spokesperson for the West Philippine Sea nga si Rear Admiral Jay Tarriela.

Si Presidente Ferdinand Marcos Jr., namahayag nga mura og hulga ang gibuhiang pamahayag ni Jing.

Ang Pilipinas nisandig og maayo sa international law ug sa 2016 Arbitral Ruling maong pinaagi sa diplomasya ang pagprotektar sa teritoryo sa nasud.

Kaning mapanghagit nga tubag ni Jing  murag kalkulado nga pagpamikil, duna ba kahay bendisyon sa gobiyerno sa China ang iyang gibuhat?

Usa sa mga diplomatikong paagi pagpaubos sa tension mao ang pagdeklarar kang Jing nga persona non grata ug palayason sa nasud. Unsa pa may gamit ni Jing kung dili diplomasya ang mogawas sa iyang baba?

Naa na sa China kung ilahang ilisan og mas angayang diplomat si Jing kung tinuod nga kalinaw ilang gustong mopatigbabaw.

Pero kun dili mopadala og ambassador ang China, kinahanglang mangandam ang Pilipinas sa posibleng bawos o plano nilang buhaton dinhi sa WPS ug sa kinatibuk-ang South China Sea ug East China Sea karong 2027, ang tuig nga gipanganti nilang sulongon ang Taiwan.