EDITORYAL - Ang himabaw sa P 1 bilyon nga bugas

May  mga  tawo  nga nagpaniid  diay   sa balita  bahin  sa 600 mil ka sakong  bugas humay  nga  nasakmit  sa  mga  tinugyanan  sa  Bureau  of Customs  sa  pantalan  ning  dakbayan  di  pa  dugay.

Nagpangutana  sila   kun  hain  na  kuno  ang  maong  mga  bugas,  giabang  ba  kini  og  pribadong  bodega,  kay  wa  may  dagkong   bodega  kining  Custom dinhi  sa siyudad.

Giingon  to  nga  ilang  gihangyo  ang  NFA  nga  adto  hiposi  ang  maong  mga  bugas  apan   mibalibad  ang  NFA  kay   may  kaugalingon  usab  kining  stock  sa  mga  sinakong  bugas.

Ang  nakalisud  kay  kining  bugas  gitawag  ra  ba  kini  nga “perishable goods”  o  madunotong  butang  inig-abot  sa tukmang  panahon.

Kun  di  kini ikaariya  sulod  sa upat  o  lima  ka buwan,  aw may  purohan  nga  abog  na lay  mapuslan  niini  sa goberno  ilabi  na  kun  maghuot  kini  sulod  sa usa  ka bodega  nga  way  maayong  bentilasyon.

Ambot  giingon  man  tong  isubasta  o  iariya  kini  sa Custom  pinaagi  sa public  auction ,  apan  nahilom  man  ug  way  mihungaw  nga  balita.

Sa  tag P1,000  lang  matag  sako,  aw  mokantidad  usab  og  P600 milyones  ang  kantidad  sa maong  mga  bugas.

Nagduda  ang  publiko  nga  wa  pa tingale  kini  iariya  sa taga  Custom   kay  wa may   kisaw  ang  taga  media  nga   maoy  tigbutyag  sa  mga  balita gikan    sa maong  ahensya.

Kun  giariya   o  nabaligya  na  ngadto  sa  mga  negosyante  ang  maong  mga  bugas,  basin   wa masayud  ang  mga  mediamen  nga  maoy  tigsibya  sa mga  kalihokan  sa Custom.

Kaanugon  baya  kun  ikabalik  na lang  sa yuta  ang  maong  mga  sinakong  bugas  ilabi  na  kun  sa ka-bisi  sa taga  Custom  mataligam-an kini  sa sulod  sa bodega  nga  ilang  gibutangan  niini.

Hinuon  nagtuo  ta  nga  pinaagi  sa tingog  sa publiko  nga  gipaagi  ning  maong  editorial, mopahibawo  ang  taga  Custom  nga  naariya  na  nila  ang maong  mga  bugas  ug  kun  wa pa  mas  maayong  ilang  ipahibawo  pinaagi  sa ilang  mga  piniyalan  nga  taga  media  nga anaa  sa maayong  mga  kamot  ang  maong  mga  bugas.

Kini  aron  nga  di  mabalaka  ang  publiko  nga  mahanaw  lang  daw  aso  ang  maong  mga  bugas    ug  magduda  sila   nga  natapigas  gikan  sa daang  matuwid    ang  maong  isyu, nga  gisubay  sa  kasamtangang  panggoberno.