Ang tuburan sa kalipay

Daghan ang mi-text nga nagsunod sa atong lindog. Halos tanan mipabuhagay sa ilang gibati nga kulang sa kalipay.  Nawad-an sa paglaom tungod sa hilabihang naangkong pag-antos tungod sa kagul-anan nga miepekto gumikan sa daghang problema. Hinuon dili kita makabasol nila kay ang kinabuhi may kaluha kana nga dili mo malikayan tagamtamon ang kalipay ug kagul-anan diha sa mga pagsulay.

“Ah, mao ba? Ambi hatagi ko’g problema kay mao nay akong kalipay.”  Matud sa siaw kong higala nga nakabasa sa mga text. Bitaw mora’g komedya lang apan kun hatagan nato’g pamalandong, may katinuoran baya kining kasinatian sa suod tang higala. Kun imong tan-awon ang iyang kinabuhi, angayan gayud nga atong mahatagan og panig-ingnan, kun buot kitang mapuslan ang tuburan sa kalipay.

Usa siya ka kabus nga nahimong adunahan. Sa iyang kasinatian, sa mga kalisud natagamtaman niya sa iyang katimawa, kanunay siyang gidagmalan sa kasakit, nga maoy nahimong hagit sa iyang pakigbisog aron makab-ot ang kalipay, pinaagi sa tumang pagmalasakit ug pagpailob sa mga problema nga bisan sa pagtulog pukawon mag-alindasay sa paghunahuna kun unsay makalipay

Sa dihang nahatagan siya’g higayon nga maadunahan, kun ato siyang sud-ongon, daw malipayon kaayo siya apan sa iyang kasingkasing gihamok sa way hunong pag-akatar sa mas daghang problema kay sa niadtong nagbaguod  pa sa iyang pagkakabus, makahimo pa sa pagpahulay. Naghimo siya’g pamalandong kun unsay mga kasulbaran nga madiskubre ang tuburan sa tiunay nga kalipay.

Tuod man sa abag sa paglaum molahutay, bisan og halos makabsan siya’g kusog ug pailob, wa siya’y panagana sa kakulian sa iyang pakigbisog… hangtud wa maamgohi nga naangkon na diay niya ang sulbad sa mga problema nga maoy nakapalipay niya. Gisangpit niya ang Dios aron kahatagan og kaalam. Sa kamatinud-anon sa pangaliya, wa mapakyas gitudloan siya kun unsay buhaton.

Gibuhat niya ang pagsagop sa tanang problema, sa isig kaingon nga kaniya nagkinahanglan sa iyang pagtabang. Wa siya mag-isip og balos sa iyang pagkamatinabangon.  Uban ang kalooy ug masinabuton, iyang nakat-onan nga ang tanan nga anaa kaniya, dili iya kun dili angay kana ipaambit niadtong anaa sa panginahanglan, aron ang kasingkasing mo mahimong tuburan sa imong kalipay.