Ang politika sa panaway

Buhi na kaayo ang politika sa Bohol ilabi na gayod sa segundo distrito. Kini kun atong ibasi ang atong obserbasyon sa mga programa sa radyo dinhi sa Sugbo nga mabati didto sa Bohol nga gituyo pagpalit sa mga kandidato aron ipahibalo ang ilang kandidatora.

Sa segundo distrito sa Bohol nag-atbang sa pagpapili sa pagka kongresista si  kanhi kongresista Roberto " Ondoy " Cajes ug kasamtangang mayor sa lungsod sa Trinidad ug si Aries Aumentado ang Chief of Staff ug anak sa namatay nga kongresista Erico Aumentado.

Maayo unta ang gihimo sa mga kandidato sa segundo distrito sa lalawigan sa Bohol nga namalit gayod og programa sa radyo aron atong mahibaw-ang mga botante dinhi sa Bohol ang ilang mga plano ug himoon kun ugaling makalingkod o mapili na sila sa katungdanan. Pero makapasubo ang atong mga nabati gikan sa usa ka kampo tungod kay ina kay maghisgot sa iyang plata porma de pang gobyerno nagsige na hinoon kini sa pagpangataki sa iyang kaatbang sa politika. Maong ako moapilar kanila sa pag- undang sa maong matang sa pagpangampanya ug pag-promote sa ilang kandidatura tungod kay dili interesado niini ang botanting bol-anon kun akjo ang pasultion. Moapilar usab ako sa pikas kampo sa dili pagsunod sa gihimo sa ilang kaatbang aron dili na  moinit pagmaayo ang politika sa atong segundo distrito.

Sa duha ka protagonista mas maayo segurong moapil mo sa pagpataas sa level sa kampanya sa matag piniliay dinhi sa nasud aron sa ingon motaas na usab ang kalidad sa mga botante sa ilang pagpili og mga mamahimong alagad sa katawhan.

Dapat respetoon ang katawhang pumipili pinaagi sa pagtanyag ug pagpresentar ngadto kanila sa inyong mga plano ug laraw nga makapataas sa kalidad sa ilang kinabuhi ug makapataas sa kalidad sa inyong pagpangalagad.

Ang katawhan wala manginahanglan sa inyong mga pagpangaway ug mga pagpanaway, ang ilang gipaabot gikan kaninyo mao ang inyong mga laraw ug mga plano. Hinaut pa unta nga maoy inyong lalisan ug lantugian sa kahanginan ang kamaayo sa inyong mga laraw ug plano sa segundo distrito.