Manakod ang pagpakabana

Nanangtang mi sa ilegal nga campaign materials sa mga kandidato pagka senador ug partylist groups sa bahin sa nasudnong highway nga nasumpay sa Dakbayan sa Mandaue ug sa lungsod sa Consolacion sa amihanang Sugbo. Gigiyahan mi sa kadagkoan sa Commission on Elections (Comelec) sa Mandaue ug gikuyogan sa nagpakabana nga mga tinun-an sa Cebu Normal University (CNU) Main Campus sa Dakbayan sa Sugbo.

Kasagaran sa campaign materials nga among natangtang, nga gipapilit sa mga poste sa suga ug gipamitay sa mga koral, ila ni Migz Zubiri sa United Nationalist Alliance (UNA), Risa Hontiveros ug Sonny Trillanes sa Liberal Party (LP) ug sa Akbayan Partylist.

* * *

Labihang lisora kun maghayon ug magtinagsa sa pagpanangtang. Kay kinakusgan nga gawgaw ang gigamit sa pagpapilit ug may pipila nga gibutang sa taas nga bahin sa poste ug sa koral aron mas bantang sa mga manglabay. Gawas nga magkuyog ang tibuok grupo, mas maayo nga magbawon sa mosunod nga kahimanan:

“Balde sa tubig ug basa nga nuog, water spray o mop aron nga mapahumok daan ang posters ug mas sayon na lang nga kagisan sa

“Palita o lapad nga kutsilyo o bisan kinamuton na lang;

“ Mubo nga hagdanan o kuhit aron maabot ang campaign materials nga di makab-ot sa kamot;

“ Pliers o cutter o martilyo alang sa campaign materials nga may mga bayanan nga kahoy o kawayan nga gilansang o gibugkosan sa alambre; ug

“ Basurahan aron nga di magkatag sa dan ug mahipos dayon ang gilangkat nga materyales.

* * *

Ug daghang pailob. Ug mas abunda nga pagpakabana. Kay kutas ang paghawan sa mga sagbot nga gipakatap sa way buot ug mapahimuslanon nga mga kandidato ug partylist groups. Kun way molihok ug manlimpiyo, moggara ang mga politiko sa ilang pagtuo nga molingiw lang ang mga botante bisan unsay binuang nga ilang pasiugdahan.

Magkadugay nga magpabilin ang ilegal ang campaign materials, molapad ug manakod ang kaluya ug kahimangod sa mga botante nga inutil gyud diay ang Comelec ug ubang buhatan sa gobyerno pagbadlong sa kalapasan sa mga lagda sa piniliay.

* * *

Mas gamay ang trabahuon kun kitang tanan ang mohawan sa atong mga tugkaran. Mas maayo pa gyud kun magkuyog ang managsilingan. Gidili ang campaign materials gawas sa common poster areas (gitumbok sa Comelec ang barangay halls ug dagkong hawan sa mga barangay).

Makatabang sab ang pagdokumento sa kalapasan pinaagi sa pagletrato sa ilegal nga campaign materials. Ipada palihog sa akong email address sa ubos. Aron masang-at dayon sa Comelec Law Department nga maoy pormal nga mopasidaan sa mga kandidato, nga kun di motangtang sa posters mahimong mamultahan, mapriso ug did-an di lang sa pagdagan kun dili apil na sa paghupot og bisan unsang katungdanan sa gobyerno.

* * *

Email: [email protected]