Asukar smuggling imbistigaha

Nakurat ko pagkadungog nga dunay usa ka senior citizen nga giingong gikuotan sa iyang kwarta sulod sa Cebu City Hall. Dili g’yud hinoon ko motoo ana da. Mahimo tingali nga nahulog ang kwarta ug napunitan, dayon ang nakapunit wala motug-an nungka nga may mangunguot nga nakasulod sa City Hall.

Ayaw ko’g ingna nga dunay mangunguot nga tiguwang? Kun batan-on ang mangunguot dili kaha mo mahibulong nganong misagol ang batan-on sa mga senior citizens?

* * *

Kinsa g’yud kaha sa mga opisyal sa Bureau of Customs ang nalambigit o kaha nagproteher sa pagsuway pagpayuhot og P10 milyones nga kantidad sa imported nga asukar gikan sa Thailand?

Kini maoy angay’ng sutaon sa mga imbistigador ug naglaum ko nga unta dunay tinarong nga imbistigasyon nga ipahigayon kay daghan ang nagduda nga adunay mga dagkong opisyal sa Bureau of Customs nga nagproteher niini.

Angay nga si Customs District Collector Ronnie Silvestre maoy maninguha nga mapahigayon ang usa ka paspas ug matinud-anon nga imbistigasyon ug silotan ang mga hingtungdan.

Klaro kaayo nga gi -misdeclare ang kargamento kay imbis mga sinako nga asukar, gideklarar kini nga kagamitan sa paghimo og eyeglasses ingon man mahalong matang sa bato. Miabot ang mga kargamento diha sa Cebu International Port (CIP) luwan sa M/V Titan nga gikan sa Thailand kaniadtong Nobiyembre 22 ug alang kuno kini sa duha ka locators diha sa Mactan Economic Zone sa Lapu-Lapu.

Dihang gisusi pinaagi sa paggamit og “X-ray,” ang nahabiling lima ka container vans nasuta nga dili man kahimanan sa paghimo’g eyeglasses ug mga bato ang sulod…. Asukar man!

Gipasakmit dayon ni Collector Silvestre ang lima ka container vans ug kadtong lain pa nga lima nga napagawas na sa CIP nga didto na napalgan sulod sa usa ka bodega sa Casuntingan, Mandaue.

Maayong iapil sa imbistigasyon ang report nga dunay opisyal sa Bureau of Customs nga mibabag nga madala pagbalik sa CIP ang tulo sa lima ka vans nga didto napalgan sa bodega.

Dunay uban nga nakapangutana kun nganong wala man moinsistir si Collector Silvestre nga dad-on g’yud sa CIP ang mga vans atul g’yud nga kini nasakpan?

Labaw’ng opisyal si Collector Silvestre sa mga kawani sa Customs dinhi sa Sugbo ug mahimo siya nga moinsistir. Buyno, mahimong kabahin unya kini sa imbistigasyon kun ipaimbistigar man kining isyu sa kadagkoan sa Customs.

Bisan og dili ko tig-anha sa Bureau of Customs, apan daghan ko og tigpaniid nga motug-an nako sa mga dili maayong kalihukan diha sa aduwana. Atimana palihug kining maong isyu Collector Silvestre.