Ang isyu sa political dynasty sa nasud

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Ang isyu nga political dynasty dinhi sa nasud maoy mga nahimong hisgotanan sa mga pundok politikanhon nga sagad kanila sa mohimo mao kadtong anaa sa mga kaatbang nga ang mga sakop sa pamilya maoy naghupot sa katungdanan.

Gigamit ang maong isyu isip kabahin sa propaganda sa mga kaatbang sa politika bisan kun walay lig-ong basehanan nga nahimong kalapasan sa pamilya sa mga politiko nga hingtungdan.

Ang pagdala sa maong isyu wala lamang mahitabo dinhi sa Sugbo nga ang daghang sakop sa pamilya nga naghupot katungdanan human usab makaangkon og kadaugan sa piniliay nga gipahigayon.

Si Kongresista Mark Villar sa Lone District sa  Las Pinaz nga nahinabi sa mga tigbalita dinhi sa Sugbo atol sa iyang pagtambong sa gihimong panagtigom sa Liga ng mga Barangay sa Southern Leyte nga gipahigayon sa Crown Regency sa dakbayan sa Lapulapu niadtong miaging adlaw miingon nga wala pa masinati ang politikanhong daynastiya dinhi sa nasud.

Gipasabot niya nga dinhi sa nasud maoy sagad masinati nga ang mga sakop sa pamilya nga naghupot og katungdanan sa kagamhanan pulos mga piniling opisyal.

Gitataw niya nga sagad sa mga sakop sa pamilya nga naghupot sa katungdanan mitugyan sa ilang kaugalingon ngadto sa usa ka piniliay nga gipahigayon.

Dugang pa niya nga sa maong piniliay nakaangkon kini og  kadaugan sanglit gibotohan man sa mayoriya nga katawhan maoy hinungdan sa paghupot niini sa katungdanan.

Matud pa niya nga nakagusto ang katawhan sa maayong serbisyo sa maong mga sakop sa pamilya nga politiko nga maoy hinungdan nga daghan kanila ang naghupot sa katungdanan.

Sa nasayran nga si Kongresista Villar sa Lone District sa Las Pinas maoy anak nga lalaki ni Senador Manny Villar nga ang iyang inahan nga si kanhi Kongresista Cynthia Villar  usa usab sa mga kandidato alang sa pagka senador sa 2013 mid-term election.