PLDT hoy gising!!

Angay na gayud tingali nga ayuhon sa Philippine Long Distance Telephone (PLDT) ang ilang kumunikasyon kay daghan na kaayong mga higayon nga palpak ang ilang serbisyo.

Nasayod man kamo nga gawas nga reporter ko sa The Freeman, reporter usab ko sa sibyaanan DYLA. Ang among sibyaanan miisyu kanamo og PLDT Sim Pack nga sila ang nagbayad.

Apan nakabantay ko nga daghang mga higayon dili makakontak, usahay maputol, may mga higayon nga samtang gidayal nimo ang buot nimo kontakon nga numero dili madungog ang ringtone sa pikas linya.

Makadaghan nga higayon nga giingnan ko sa akong mga gipangkontak nga nagsigi sila’g “Hello! Hello! Hello!” apan wala nila madungog ang akong tingog.

Sagad nga maatol ang bati nga serbisyo sa PLDT kanang panahon sa udto nga ting-report namo nga mga reporters ngadto sa among sibyaanan. Paita g’yud sa serbisyo ninyo uy.

Dili kini pagdaut ang akong gihimo kun dili, usa kini ka “eye opener” sa mga opisyal sa PLDT nga palamboon ninyo ang inyong serbisyo sa publiko aron walay mamahawa ug dili na mo-subscribe kaninyo.

Sayonan ka, pagka ala 1:10 kagahapon sa hapon, gisuwayan nako og dayal ang akong numero, uy makontak na man! Kun ingon niini ang kanunay’ng mahitabo, hayan nga kadudahan ko nga nagtinapolan sa akong trabaho. Tiaw mo, gisuwayan nila og tawag ang akong numero kay sa akong pagtoo dili lang tingali ko makakontak kay busy, giteksan ko sa among news anchor nga dili makontak ang akong numero.

Ang-ang na man usab og gamiton lang g’yud nako ang akong ubang cellphone nga gigamitan og Pre-Paid cards aron pag-report sa radyo. Usbon nako alang sa mga opisyal sa PLDT, ayoha ang inyong serbisyo.

* * *

Nalipay ko sa pasalig sa MCWD nga tun-an nila ang akong awhag nga mobutang sila og linya sa tubig gikan sa eskena sa barangay Busay paingon ngadto sa Upper Sitio Fatima, sakop sa Barangay Apas.

Personal gayud nako nga giawhag si MCWD General Manager Armando Paredes nga kaluy-on ang daghang mga lumulopyo sa among sityo nga nag-antos sa kamahal sa tubig.

Duna man mi koneksyon sa tubig apan ang koneksyon gikan sa mga adunahan nga maoy migasto og koneksyon dayon gibaligya ang tubig kanamo sa kantidad nga P75 ang matag cubic meter.

Sa akong bahin, ang akong 14 ka cubic meter nga mahurot sa usa ka buwan, mogasto ra unta ko og P225 . Abi ninyo’g tag pila ang akong mabayran sa usa ka buwan? Kwentaha sa tag P75 ang cubic meter. Palihug Sir Paredes, tabangi ang mga kabus nga lumulopyo nga dili mosamot og kapobre. Naa na man g’yud ta’y tubig, ang problema ang linya na lang gayud nga makaabot sa duol sa ilang kabalayan.

Kun sila gud ang mogasto gikan sa MCWD main pipe atubangan sa Busay Barangay Hall, ang matag pamilya mogasto og P30,000 sa tubo ug suhol sa motaud.

Maayo unta og ang atong mga opisyal sa kagamhanan maghuna-huna sa pagtabang sa mga hingtungdang lumulopyo.

* * *

Sugod karon, may mabasa na kamo nga mga feature stories kabahin sa mga drayber ug ubang isyu nga maglambigit ang transportasyon. Mabasa kini ninyo sa Manobela Page niining mantalaan.

Masabtan na gayud kaayo sa mga drayber unsay ilang buhaton. Isip deputized agent sa LTO, suheto ko sa mga isyu ug makatabang ko sa mga drayber nga makasabot sa balaud sa pagmaneho’g sakyanan.