Haruhay nga Pagpuyo o kasakit ug kamatayon

Nagkainit na ang politika sa dakbayan sa Sugbo ug klaro na kaayo nga magsangka si Mayor Michael “Mike” Rama ug si kanhi mayor ug kasamtangan kongresista sa habagatang Sugbo si Tomas “Tommy Osmeña.

Kun dili mabaraw ang dagan sa panahon, sama sa aksedenti o kaha kalit nga atake sa panlawas sa duha ka protagonista, si Mike Rama ug si Tommy Osmeña mag-abot sa bugnong lugaynon karong umaabot nga Mayo 2013.

Alang sa mga pumipili o botante dili sila maglisod sa duha ka kandidato kun kinsay ilang pilion pagka-mayor basi sa han-ay sa mga issue ug plataforma nga mao ang mosunod:

1. PANLAWAS (health)

Rama. Buot ni Rama nga palambuon ang Cebu City Medical Center (CCMC) pinaagi sa pagpalit og moderno nga kahimanan alang sa dugang serbisyo ug usab dugang pundo aron makapalit og igong tambal alang sa masakiton. Kini wala tugti sa konseho ubos sa mando ni Osmeña.

Osmeña. Iyang wagtangon ug ibaligya ang CCMC ug ang mga masakiton adto na magpatambal sa health center ug ubang hospital pampubliko o kaha sa pampribado nga hospital. Gani ang iyang P2 milyones nga pundo ug P3 milyones nga pundo sa iyang igsuong Serg Osmeña didto ihatag sa Vicente Sotto Memorial Hospital.

2. Infrastruktura

Rama. Gikan sa budget nga iyang gipangayo sa konseho (gisalikway) ang programa ni Rama mao ang pagtukod og bag-ong drainage system sa siyudad aron paglikay sa kanunay’ng baha inig bundak sa ulan. Paglimpyo ug pagpalapad sa mga sapa ug kanal ug balhinon ang mga illegal settlers nga mamuyo sa mga delikadong lugar. Moderno nga Carbon Market mao usab ang proyekto ni Rama.

Pag-abli, aspalto ug semento sa mga karsada sa bukiran bahin sa dakbayan usab pag-ayo sa mga gubaon nga karsada sa ubos nga bahin sa dakbayan.

Osmeñ. Ang konseho ubos sa mando ni Osmeña dili buot nga kini mahitabo. Ang budget alang niini apil sa P11 bilyones kapin nga gipangayo ni Rama apan wa kini aprobahi sa konseho.

3. TRABAHO

Rama. Giuyonan ni Rama ang katukoran sa Ciudad Project sa probinsiya sa Sugbo apan dili mosugot si Osmeña ug ang mga itoy-itoy niya sa konseho. Kini unta makahatag og liboan ka trabaho sa mga taga-dakbayan usab makadani og turista ug paglambo sa patigayon.

Osmeña. Dili kini mahimo kay siya na ang magbuot.

4. SUNOG UG BASURA

Rama. Nangayo og pundo si Rama sa iyang budget aron makapalit og mga moderno nga kahimanan ang City Fire Department. Sayud kita nga daghan na ang multi-storey nga edipisyo sa dakbayan ug wala’y step-ladder ang kabomberohan alang niini. Kanunay gihamok og sunog ang dakbayan ug dili kita makapaabot sa national nga mopalit sa maong mga gamit.

Buot usab ni Rama mopalit og barge para ihakot og basura apan kini gibalibaran gihapon sa konseho.

Osmeña. Bahal na tingali og minilyon ang danyos sa kabtangan o ba kaha daghan ang mangamatay sa sunog. Kini ang baruganan sa pundok ni Osmeña. Gidid-an si Rama pagbaligya og luna sa South Road Properties (SRP) o makautang sa banko aron paggasto sa salapi alang sa kasigurohan sa kinabuhi ug malinawon nga paghuna-huna sa mga lumolupyo sa dakbayan.

5. PAGPANINDOT (beautification)

Rama. Ubos sa pagtambayayong sa siyudad, probinsiya ug pribado nga sector, gipanindot ang sidewalk gikan sa Kapitolyo lahos sa Fuente Osmeña. Kining tuiga malahos na kini sa downtown area. Ang mga parks iya usab palambuon ug panindotan.

Osmeña. Wala’y ingon ani nga programa si Osmeña. Igo lang siya mangaway ug mosaway. Iyang tabangan bisan laing dapit sama sa Cordova kay duna may real estate project nga iyang gihanduraw.

6. MUSIKA UG KULTURA

Rama. Gusto ni Rama nga makapundar og banda ang siyudad alang sa mga kalingawan sa mga taga-barangay matag fiesta o kaha sa mga special nga okasyon. Si Rama buot nga magpadayon ang mga kabataan nga mosalmot sa Sinulog.

Osmeña. Gibabagan kining maong laraw ni Rama ug iya usab putlon ang pag-apil-apil sa mga kabataan sa Sinulog.

Asa mo ani? Haruhay nga pagpuyo o kalisdanan, ug simbako, kamatayon!