Bastos nga dispatser

"Kanang mga dispatser diha sa atubangan sa Bread And Butter grabe ka bastos. Naa untay polis pero wala man kadakop." -- 0909-7976088

Hinaot unta nga mahatagan kini’g pagtagad sa kagamhanang lokal sa dakbayan sa Mandaue kay nakahasol sa mga PUJ driver ang mga dispatser nga naglihok sa lainlaing dapit sa maong siyudad.

Maayo sab unta kun badlongon ang maong mga dispatser sa mga polis ug dili kay maghinan-aw lang sila sa mga badlongon sa katilingban!

* * *

"Good day, Sir. Naa unta koy ireklamo parte ining among doktor diri sa Sta. Rosa, Olango Island. Kasab-an man ang magpa-check up og gabii. Nagpa-check up mi sa akong pag-umangkon nga 7 months old pa. Mga alas 8 sa gabii. Ngano kunong wa mi patsek-ap sa adlawan pa. Unsaon nangita pa man mi’g kuwarta." -- 0919-2643345

Basin og concern lang sa doktor sa kahimtang sa batang pasyente maong nakasulti siya’g ingon niadto. Bulawanon man god ang kinabuhi busa kinahanglang maluwas kini sa labing daling panahon.

Balido man sab hinuon ang inyong rason nga nangita pa mo og kuwarta. Pero panahon sa emerhensiya, mas importante nga madala dayon ngadto sa doktor ang kinabuhi nga luwasonon ug ang kuwarta isunod ra.

Hinuon, nakasabot sab ko sa inyong side nganong morag nasilo mo sa doktor. Kana kun tinuod nga gikasab-an mo. Kay espoko ba sab nga kamo pay naay problema, kamo pay gikasab-an.

Anyway, bukas kining lindog alang sa pagpasabot sa doktor sa iyang habig.

* * *

Ang naggamit sa cellphone number 0920-7456811 mi-text nako niadtong November 30, 2008 ug ngadto sa akong asawa sa December 1, 2008. Ang unod sa text nga iyang gipadala nako mao ra sad ang iyang gipadala sa akong misis. Pagpanghulga!

Matud niya, dili na kuno mi abtan og Pasko! Nasabot kong wala siya makauyon sa among pagpanuwat. Ambot og ngano? Lasaw tingalig utok ning tawhana maong wala makasabot nga igo ra ming nagbutyag sa kamatuoran.

* * *

 (Sumbong ug reklamo? Text sa 0910-8105522).