Biyahe sa Taiwan

Motuo na gyud ko karon nga ang pagbiyahe sa laing nasud usa ka puhonan sa tawo. Tungod kini sa daghang kasinatian sa lugar nga maduawan ug ang mga kasayuran niini nga masayran nga dili gani kabayran og salapi.

Mao kini ang akong nahibaw-ang butang sa akong pagbiyahe sa Taipei, Taiwan uban ang pipila ka mga editor ug brodkaster aron pagduaw sa duha ka dako nga power plant sa maong lugar.

Ang maong mga planta, nga gipadagan sa Formosa Heavy Industries, ang higante nga kompaniya sa tibuok kalibutan nga natawo ug nagbase sa Taiwan, gigamitan og coal, apan tungod sa teknolohiya nga gigamit pagsunod sa coal aron makamugna og elektrisidad, naminusan nila ang sulfur oxide ug nitrogen oxide nga mas mubo pa ang gidaghanon nga mabuga kay sa gilimit niini.

Unang planta nga among giduaw niadtong Biyernes, Nobiyembre 14, mao ang Jhin-Shin Power nga nahimutang sa TaoYuan County. Kini nga co-generation facility nga adunay 200 tons per hour coal-fired boiler nagsuplay og elektrisidad hangtod 53,560kW ug 55 tons kada oras nga processed steam, sa mga pabrika nga nanghimo og LCD, PCB ug semiconductors.

Ikaduhang planta nga among naduaw mao ang Hwa-Ya Power Plant nga nahimutang sulod sa Hwa-Ya Technology Park sa KueiShan Tao Yuan County. Kini nga planta sa kuryente nagsuplay usab kini og kuryente sa mga silingang pabrika.

Kining klase nga mga limpyo nga planta sa kuryente sa Taiwan mao unya ang klase nga power plant nga tukoron sa Sangi, Toledo pinaagi sa consortium sa Global Formosa Power Holdings, Inc., Aboitiz Power Corp. Abovant Holdings, Inc. ug padaganon pinaagi sa Global Business Power Corp.

Human sa maong duha ka planta, giduaw namo ang Taipei 101, ang labing taas nga building sa tibuok kalibutan.

Gisaka namo ang 89th floor sa Taipei 101 sa maong building. Kun motan-aw ka sa gawas makita gyud ang mga panganod ug ang mga building sa palibot niini kinahanglan pa nga duk-on aron makita tungod kay hilabihan nang gagmaya.

Ang among kauban nga si Jonji napugos sa pagbilin sa iyang backpack tungod kay gidili ang maong klase sa bag sa mga tawo nga mosaka sa kina-ibabwan sa Taipei 101. Tungod tingale sa kataas, adunay mangahas sa pag-ambak sa maong building aron mag-parachute.

Sa ikaduhang adlaw sa Taipei niadtong Sabado, among giduaw ang Taiwan National Museum. Ang maong museum na-establisar niadtong 1908 pinaagi sa colonial government sa Japan sa dihang ang Taiwan ubos pa sa pamunoan sa Japan.

Apan ang sulod sa maong museum mao ang mga nagkadaiyang mga butang, gikan sa painting, libro, duwaan, flower base, plato ug mga sapot sa mga karaang lider sa China nga gibalhin gikan sa mainland China atol sa civil war sa China.

Didto ko nakapalit og nindot nga Chinese décor nga napalit og 200 new Taiwan dollars.

Human sa museum, didto kami maniudto ibabaw sa incinerator sa Taipei sa ilang gitawag og Rotating Restaurant. Gitawag kini og rotating restaurant tungod kay samtang nangaon kami, nagtuyok ang sawog ug tungod kay nagtuyok kami, nakita namo ang palibot sa Taiwan nga hilabihang kalimpyo, lakip na ang ilang suba nga kaniadto nanimaho tungod sa mga itik, apan karon hilabihan nang kalimpyo tungod sa ‘political will’ sa liderato sa maong nasud nga limpyohan ang palibot.

Apan ang labing nindot namo nga kasinatian sa Taiwan mao ang pagduaw namo sa ilang Night Market diin didto mapalit ang nagkadaiyang mga sinena. Hinuon, mahal ang ilang mga sinena nga baligya, dili sama sa mga sinena nga atong mapalit sa mga Taiwanese store dinhi sa Sugbo.

Apan sa maong night market nako nakita ang mga batan-ong babaye nga hilabihang ka-sexy nga hapit na gani makita ang ilang mga bra ug panty sa ilang sinul-oban. Sa mga lalaking Taiwanese, normal lamang alang kanila nga makakita kanunay sa sinul-oban sa ilang mga babaye.

Usa sa nakahatag og impresyon unsa ka-maayong tawo ug kakugihan sa mga taga Taiwanese, mao ang bise presidente sa Formosa Heavy Industries ug representante sa maong kompaniya dinhi sa Pilipinas nga si Mr. Hong.

Bisan sa iyang gihuptan nga posisyon sa Formosa, personal siya nga nagsilbe kanamo aron sa paglingaw ug pagdala kanamo sa mga tourist destinations sa Taiwan.

Katapusan namo nga giduaw ang Chiang Kai-Shek Memorial. Alang sa wala makaila, si Chiang Kai-Shek mao ang kanhi heneral sa China nga gipugos sa liderato kaniadto sa China sa pagkagiw paingon sa isla sa Formosa nga mao na karon ang Taiwan.

Tungod niini, nahimo siyang presidente sa Taiwan. Apan tungod “one-China policy” nga giila karon sa United Nations, ang Taiwan nagpabilin karon nga probinsiya sa China. Apan aduna silay kaugalingon nga gobyerno ug aduna sila’y kaugalingon nga ekonomiya.

Sa Chiang Kai-Shek Memorial didto gilubong si Chiang Kai-Shek.

Human sa Chiang Kai-Shek Memorial, mideretso kami balik sa Taiwan TaoYuan International Airport balik sa Cebu.