Kapangyarihang bumisita at mag-inspeksiyon
DAHIL sa reklamong natanggap mula sa 21 guwardiya ng EBVSAI, gumawa ng imbestigasyon ang Regional Office ng Department of Labor (DOLE-RO). Nag-inspeksiyon sa lugar na ginuguwardiyahan ng mga security guards at napag-alaman ang mga sumusunod na paglabag ng kompanya 1) hindi nagpapakita ng mga record, 2) hindi nagbabayad ng holiday pay, 3) hindi nagbabayad ng rest day premium, 4) hindi nagbabayad ng tamang night shift differential pay, 5) hindi nagbabayad ng service incentive leave, 6) hindi nagbabayad ng tamang 13th month pay, 7) kakulangan ng medical report, 8) walang taunang accidental report, 9) walang safety committee at 10) walang bihasang first aider.
Nang araw ding iyon, naglabas ng notice of hearing ang opisina. Hinihingan ng paliwanag ang EBVSAI. Nagtalaga na rin ng apat na petsa para sa paglilitis ngunit hindi naman nagpakita ng ebidensiya ang kompanya upang maitama ang resulta ng imbestigasyon. Kaya naman inutusan ng DOLE-RO ang EBVSAI upang bayaran ang kakulangan sa mga guwardiya na umabot din sa P763,997.85. Kailangan itong bayaran sa loob ng 10 araw kung hindi ay ang ahensiya na mismo ang kikilos upang ipatupad ito.
Umangal ang EBVSAI. Nakiusap ang kompanya sa DOLE na baguhin ang naging desisyon. Di-umano, ayon sa batas (Art. 129 & 217[6] Labor Code) hindi saklaw ng kapangyarihan ng ahensiya ang mga reklamo tungkol sa pera (money claim) na hindi lalampas ng P5,000. Dagdag pa ng kompanya, dapat na inilipat na lamang ng ahensiya ang usapin sa Labor Arbiter. Binalewala ang mosyon ng EBVSAI dahil kinumpirma pa mismo ng secretary ng DOLE ang nasabing utos. Tama ba ang Kalihim?
Tama. Hindi man nabanggit sa nasabing batas (Art. 129 & 217 Labor Code) ang tungkol sa kapangyarihan ng Kalihim at ng kanyang mga kinatawan upang bumisita at magpatupad ng batas na ginawa para pangalagaan ang mga manggagawa, nananatili pa rin ang kapangyarihang nabanggit lalo at tungkol sa kasong may kinalaman sa ugnayan ng mga empleyado at ng kanilang mga amo. May kapangyarihan ang kalihim o di kaya ay ang kanyang mga kinatawan upang maglabas ng mga kautusan o ang tinatawag nating “compliance orders”. Ang mga kautusang ito ay base na rin sa naging resulta ng mga imbestigasyong ginawa. Ang kapangyarihan ng DOLE-RO ay namamayani kahit pa nga lampas P5,000 ang hinihingi ng taong sangkot.
Upang makawala sa kapangyarihan ng DOLE-RO o di kaya naman ay sa mga kinatawan nito, dapat na 1) kinuwestiyon ng nagpapatrabaho ang naging resulta ng imbestigasyon at naghain ng mga reklamo o isyu ukol dito, 2) sa pagsagot sa nasabing isyu, kailangang suriing mabuti ang mga ebidensiya at 3) ang mga usaping ito ay hindi basta-basta malulutas sa pamamagitan ng pangkaraniwang inspeksyon o imbestigasyon. Dapat na ungkatin ito ng nagpapatrabaho habang nililitis ang kaso o di kaya ay matapos matanggap ang resulta ng inspeksyon.
Sa kasong ito, hindi kinuwestiyon ng EBVSAI ang naging resulta ng imbestigasyon kahit pa nga nakatanggap na ang kompanya ng resulta nito. Nang utusan na ang kompanya na magbayad ay saka pa lamang ito nagtanong. Dagdag pa rito, ang mga ebidensiyang nakalap mula sa EBVSAI ay madaling kumpirmahin dahil ang mga dokumento at record na dapat nilang panghawakan ay nasa lugar kung saan nakatalaga ang mga guwardiya (Ex-Bataan Veterans Security Agency Inc. vs. Secretary of Labor et.al., GR 152396, November 20, 2007).
- Latest
- Trending