Butane/LPG refillers

Husto g'yud ang nauyonan sa kahugpongan sa mga Butane/LPG refillers dinhi sa Sugbo nga magtinabangay sila aron masumpo kining mga backyard refillers og LPG ngadto sa mga Butane canisters.

Bisan tuod og wala pay papeles gikan sa kagamhanan nga nagtugot sa industriya sa pagpang-refill og Butane canisters nga gisudlan nila og LPG, apan ang mga sakop sa Cebu Budget LPGas Association, Inc. mihimo na og mga paagi nga malikayan ang aksidente sa ilang patigayon.

May kahimanan sila nga magsukod sa LPG nga masulod sa canisters, apan kining mga backyard refillers wala sila niining maong kahimanan ug bana-bana lang ang ilang gihimo.

Kun maghinobra ang LPG nga masulod sa lata, mao kini ang posible nga makamugna og aksidente. Unya, may taga Liloan nga mipahibalo kanako nga sa Barangay Jubay, adunay nag-refill og LPG nga walay klaro nga kahimanan.

Ang mipahibalo nako miingon nga "tuwad-tuwad" ra sa tangke sa LPG ang pagbalhin ngadto sa canisters. Angay'ng aksyonan ug susihon dayon kini sa mga tinugyanan sa kagamhanan.

Sigun sa report, ang backyard refilling anaa kini mahimutang kilid sa Pepito Beach Resort. Kamo, basin may nahibaw-an mo nga nag-operate og backyard refilling sa LPG, i-report dayon kay kuyaw kini sa sunog.

* * *

Anam-anam na ko nga nakatuo nga gituyo gyud nga ang mga basura diha sa mga barangay nga ang mga kapitan alyado sa Team Rama gipundok ug wala dayon hakota aron masuko ang mga tawo sa mga mga sakop sa Bando Osmeña Pundok-Kauswagan.

Miadto ko sa Barangay Inayawan sa miaging Miyerkules ug nakita nako ang mga sinako nga basura nga nagtipun-og duol sa merkado. Ang kapitan sa Inayawan alyado sa Team Rama.

Natural nga masuko gyud tuod ang mga tawo kun dili mahakot ang mga basura kay idugtong man dayon kini sa wala pag-aprobar sa Supplemental Budget-1.

Ang nakapatingala nako kay ang Barangay Mabolo, Lahug, Guadalupe ug Labangon nga BOPK ang mga kapitan wala man maghimo niini nga gipatipun-og ang mga sinako nila nga basura, gihakot man dayon.

Angay'ng iladlad usab sa Executive Department kun nagasto na ba gyud ang kinatibuk-ang P101 milyones nga nagahin sa garbage tipping fee gikan kaniadtong Enero.

Unya, kinahanglang tubagon usab sa mga opisyal sa City Hall kun ngano nga P700 man ang bayad sa dakbayan sa matag tonelada nga basura nga malabay ngadto sa private landfill sa Consolacion, samtang ang lungsod nagbayad lang og P350.

Makaduda gyud tinuod nga adunay pipila ka opisyal dinhi sa dakbayan nga nakakuwarta sa basura. Unya, laing tubagonon kun tinuod ba nga ang usa sa mga alyado ni Mayor Mike Rama nalambigit sa paghakot sa mga basura paingon sa Consolacion?

* * *

Miadto ko sa dakbayan sa Lapu-Lapu kaniadtong Sabado ug nakapanglingo-lingo ko sa grabeng problema sa trapiko sa Mandaue. Moirog lang ang sakyanan og tag pila ka dangaw kada minuto.

Nagsugod ang grabeng traffic tungod sa Cebu International Convention Center ug lahos na sa tiilan sa 1stMandaue-Mactan Bridge. Abi ninyo og ngano?

Walay traffic enforcers nga akong nakita nga nagdumala sa pagpahapsay unta sa trapiko. Takulahaw lang nga misantop sa akong hunahuna si Mayor Jonas Cortes.

Usa sa nakaingon sa traffic kay two-way ang mga sakyanan paingon sa bridge, ug inig-abot sa "approach" sa bridge, mag-ilogay kini sa One-away na lang nga lane.

Kun may traffic enforcer pa nga gidistino, aw bisan og daghang sakyanan apan mas paspas unta ang pagsibog kay sa mag-ilogay. Suheto ko niini kay nakasuway ko nianang trabahoa diha nga may higayon nga miabag ko pagdumala sa huot kaayo nga traffic sa Fuente Osmeña.

Bantog ra diay hagiton lang og debate si Mayor Cortes ni Dr. Paulus Cañete kay wala man diay kay gihimo ug mura ka man og wala magtagad sa problema sa trapiko sa Mandaue.