Pukaw ni Garcia

Human sa iyang pagbanos pagduma sa Kapitolyo niadtong 2004, usa sa labing unang gipalayas ni Gobernador Gwen Garcia gikan sa luna nga gipanag-iya sa Lalawigan sa Sugbo mao ang substation sa Cebu City Fire Department. Bisan nihangyo ang kabomberohan nga magpabilin lang sila aron nga mas daling makatubag sa bisan unsang alarma sa sunog sa uptown area, wa sila paminawa ni Garcia nga nilusad sa determinadong kampanya pagbakwi sa mga luna sa lalawigan nga gigamit sa mga ahensiya sa kagamhanan ug pribadong mga kahugpongan.

Nagkarakara ang mga bombero sa pagpangita og kabalhinan. Maayo na lang nga gihatagan sila og luna ni Cebu City Councilor Jingjing Faelnar. Maong ang substation sa kabomberohan didto nalagpot sa Barangay Guadalupe, sa suok nga bahin sa Dakbayan sa Sugbo, pila ka kilometro gikan sa Kapitolyo.

* * *

Nga maoy gigikanan sa kabomberohan pagtubag sa alarma sa sunog sud sa compound sa Kapitolyo gahapon sa kadlawon. Maong inay modiretso na lag pasirit sa tubig sa ilang tugkaran, gawas nga makatabang sab unta pagpugong sa sunog, nakabuylo nang kayo nga ilang naabtan.

Di hinuon ni makatabon sa ahat nga pagdeklarar sa mga bombero nga under control nang kayo, sa ilang pagkumpiyansa ug kapakyas pagpawong sa nagbaga ug nagpuot pa diay nga bahin sa building, nga maoy hinungdan sa ikaduhang pag-ulbo sa kayo. Samtang momatuod ni sa makausa pa sa kakuwang og katakos sa kabomberohan pagtuman sa ilang batakang gimbuhaton, hinaot nga makapapugwat sab ning Gobernador Garcia nga dunay mga pangalagad, nga di tingali mahimong kapanguwartahan sa Kapitolyo, apan mahinungdanon kaayo alang sa mga Sugbuanon.

* * *

Sa iyang pagpalayas sa kabomberohan gikan sa Kapitolyo, gihikawan ni Garcia sa presensiya sa mga bombero, bisan kadudahan ang ilang pagtino kontrolado na bang kayo, mas maayo lang gihapong may mga bombero kay sa wa, ang tanang buildings sa uptown area. Ang bisan unsang ginansiya nga nakuha niya sa pagpalayas sa mga bombero, nasuklian og mas dakong kadaot sa sunog nga nakaugdaw sa daghang kabtangan gahapon sa kadlawon.

Apil sa gihulgang palayason sab ni Garcia gikan sa luna sa lalawigan mao ang Emergency Rescue Unit Foundation (ERUF). Kansang katakos, lahi sa kabomberohan, napamatud-an na sa pagtabang di lang sa mga Sugbuanon kon dili apil na sa mga molupyo sa ubang mga lalawigan. Kon nakalimot na si Garcia, ang ERUF uban sa Dakbayan sa Sugbo ug boluntaryong mga Sugbuanon, nga naglakip sa mga doktor sa Cebu Medical Society (CMS) nga iya na sab rong gihinginlan, maoy labing unang nakatabang sa mga biktima sa lapad ug kalit nga pagbaha sa iyang kanhi pinuy-anan sa Ormoc City, Leyte.

Angay sang pahinumdoman si Garcia nga ang labing mahinungdanong tahas sa kagamhanan mao ang pagserbisyo-di ang pagnegosyo.

* * *

Email: [email protected]