Batangas shootout: 3 suspek, 1 pulis todas
MANILA, Philippines — Patay ang tatlong lalaki na pinaghihinalaang miyembro ng gun for hire at isang pulis sa naganap na shootout sa Calatagan, Batangas, kamakalawa ng gabi.
Kinilala ang mga nasawi na sina Patrolman Gregorio Panganiban Jr., nakadestino sa Calatagan Police at tatlong suspek na sina Joel Robles Herjas; Rolly Herjas; at Gabriel Robles Bahia, pawang mga residente ng Barangay Biga ng nasabing bayan.
Nasugatan naman nang tamaan ng ligaw na bala sina Joselito Carlum; at Mayumi Dunaway.
Ayon sa ulat, bago nagkaroon ng shootout, alas-10:00 ng gabi ay nakatanggap ng impormasyon ang pulisya na mayroon umanong tatlong armadong kalalakihan na nakatambay sa paligid ng Calatagan Cockpit Arena.
Napag-alaman na ang mga armadong suspek ay pakay umanong itumba si Michael Comaya, isang municipal councilor ng Lian, Batangas at administrador ng nabanggit na cockpit arena.
Agad rumesponde ang mga otoridad sa area para i-verify ang nasabing report gayunman, habang paparating ay agad silang pinaputukan ng mga suspek at tinamaan agad si Panganiban sa dibdib.
Gumanti ang mga pulis ng putok hanggang sa mapatay ang tatlong gunman. - Ed Amoroso
- Latest
