Bag-ong depensa ni Sara

Dunay bag-ong depensa si Bise Presidente Sara Duterte: Ang pag-angkon nga siyay tag-iya sa GenCorp Industries Inc. usa diay ka honest mistake. Good faith kuno. Iyang tigpamaba nanghambog pa nga mas matinud-anon siya kay sa ubang politiko, kay niangkon imbes mohimakak sa pagpanag-iya.

Morag ang pag-angkon sa sayop mas dakong serbisyo publiko kaysa pagsulti sa tinuod sa unang higayon. Pero dunay gamayng problema. Dili kausa ra ang sayop. Kon dili kaupat. Sa Statements of Assets, Liabilities and Net worth (SALNs) sa 2022, 2023, 2024, ug 2025, balik-balik niyang gilista ang GenCorp isip business interest. Duna siyay upat ka kahigayonan pagkurihir sa sayop. Unsa man kini? Typographical error nga naay annual subscription?

* * *

Sa laing kompaniya nga gilista sa iyang SALN, Metro City Chow Foods, gipamatud-an sa corporate records ang iyang 20 porsiyento sa shares. Sa GenCorp, wala siya sa lista sa stockholders. Pero niangkon ang corporate counsel nga nakadawat si VP Sara og ?2.14 milyones gikan sa GenCorp isip return of capital sa iyang “loose investment.” Mahugot o maluag man, kalapasan sa 1987 Constitution ang padayon niyang pagnegosyo.

Sa balaod, mas bug-at ang admission against interest. Ubos sa Section 26, Rule 130 sa Rules of Court, ang deklarasyon sa SALNs ni VP Sara magamit batok niya. Dili paigo ang pagkumpisal nga nasayop. Kinahanglang dunay ebidensiya pagmatuod sa sayop.

* * *

Dili igo ang pagwara-wara og good faith. Kinahanglan ipakita nganong nasayop, kinsa ang responsable, unsay dokumento, ug nganong wala matul-id sa upat ka tuig. Ang Korte Suprema nihukom nga ang gagmay ug panagsang sayop sa SALN mahimong mapasaylo. Pero upat ka sunod-sunod nga deklarasyon dili na ordinaryong sipyat.

Ang pangutana dili lang nganong nasayop siya. Kon dili nganong upat ka tuig siyang nagbalikbalik og kasayop?

* * *

Labing luod: Gipasigarbo pa nga matinud-anon siya kay niangkon. Ang kamatinud-anon dili masukod sa kaabtik sa pag-angkon kon nadakpan na. Masukod kini sa ka-sakto sa deklarasyon sa wala pa pangutan-a.

Ang SALN dili diary nga mahimo lang wiris-wirisan. Gipirmahan niya under oath ang dokumento. Laing kalibogan: Naabtan si VP Sara og pito ka buwan human nabisto ang iyang SALNs sa House impeachment proceedings niadtong Abril una nakahunahuna pagkumpisal sa sayop karong semanaha.