^

Banat Balita

Kahadlok sa asf gituhuang hinungdan nga nibarato ang baboy

Jonnavie Villa - Banat

CEBU, Philippines — Gidudahang gigamit sa pipila ka negosyante ang kahadlok sa African Swine Fever (ASF) aron mapugos ang mga mag-uuma og baboy sa pagbaligya sa ilang mga kahayupan sa mas ubos nga presyo, diin mokabat na lang sa P105 kada kilo ang farmgate price sa pipila ka lugar sa Sugbo.

Ang pangu sa Cebu Provincial Veterinary Office (PVO), Dr. Mary Rose Vincoy atol sa 2027 budget hearing miingon nga dugang kini sa mga problema nga giatubang sa mga hog raiser, ilabi na ang pagsaka sa presyo sa feeds, gasolina ug kompetisyon gikan sa imported nga karne sa baboy.

Matud ni Vincoy, adunay mga hog raiser nga gustong mobaligya sa ilang mga baboy ngadto sa mga pumapalit gikan sa Cebu City apan gitanyagan lamang og P105 hangtod P120 kada kilo.

Lakip sa mga hinungdan nga nakaapekto sa presyo mao ang kahadlok sa ASF, diin giingong gigamit kini sa pipila ka negosyante aron makahangyo og mas barato nga presyo gikan sa mga mag-uuma.

Tungod niini, gisugyot ni Board Member Cesar Baricuatro nga maggahin ang kagamhanang probinsiyal og pundo alang sa pagpalit sa bakuna batok sa ASF aron matabangan ang industriya ug mahupay ang kahadlok sa mga hog raiser.

Matud ni Baricuatro, nakigsulti siya kang Department of Agriculture Assistant Secretary for Swine and Poultry Michael Garcia ug nahibaw-an niya nga anaa na ang bakuna apan nahurot na ang libreng suplay gikan sa national government.

Miingon si Vincoy nga bukas ang PVO sa paglakip sa pagpalit sa ASF vaccine sa ilang badyet apan posibleng dili kini igo aron matabonan ang panginahanglan sa tanang hog raiser sa probinsya.

Matud niya, mangita ang opisina og laing tinubdan sa pondo sa higayon nga makagawas na ang mga giya gikan sa Department of Agriculture ug Bureau of Animal Industry (BAI) kabahin sa pag-apod-apod ug paggamit sa bakuna.

Gipasabot ni Vincoy nga dili lamang ASF ug pagsulod sa mga baboy gikan sa ubang probinsya ang hinungdan sa kalisod sa industriya. Lakip usab niini ang kadaghan sa suplay sa baboy, inflation, pagsaka sa presyo sa gasolina ug mahal nga feeds.

Base sa datos sa DA Central Visayas nga gipresentar ni Vincoy, anaa sa 134 porsiyento ang hog sufficiency level sa Sugbo, nga nagpasabot nga mas daghan ang produksyon sa baboy sa probinsya kon itandi sa lokal nga panginahanglan.

Samtang, gipakita sa datos sa PVO nga nagkalainlain ang farmgate price sa tibuok probinsya, gikan sa P110 hangtod P250 kada kilo.

Giawhag sa PVO ang mga Cebuano nga lechonero nga mopalit sa lokal nga mga hog raiser apan giila niya nga adunay dugay nang kasabotan ang pipila ka negosyo sa ilang mga supplier gikan sa gawas sa probinsya. (BANAT NEWS)

AFRICAN SWINE FEVER

  • Latest
Latest
Latest
abtest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

Get Updated:

Signup for the News Round now

FORGOT PASSWORD?
SIGN IN
or sign in with