4 DPWH district engineers sinibak dahil sa iregularidad
MANILA, Philippines — Sinibak sa puwesto ni Department of Public Works and Highways (DPWH) Secretary Giovanni Lopez ang apat na district engineers dahil sa umano’y mga iregularidad sa mga proyekto ng ahensiya, kabilang ang mga kontrobersiyal na flood control projects.
Kabilang sa mga tinanggal sina Hermon Ines ng Tarlac 1st District Engineering Office, Saidale Mitmug ng Cotabato 3rd District Engineering Office at Clifton Valencerina, officer-in-charge ng Apayao 2nd District Engineering Office.
Sinibak din si Amron Mitmug ng Lanao del Norte 2nd District Engineering Office kaugnay ng pag-isyu ng mga certificate of implementability para sa 59 proyektong nakapaloob sa 2027 national budget.
Ayon kay Lopez, lumabas sa pagsusuri ng mga dokumento at aktuwal na inspeksiyon na hindi pala maipatutupad ang 59 proyekto na sertipikadong handa nang isagawa ni Mitmug sa sandaling mailabas ang pondo.
Binigyang-diin ni Lopez na dapat may sapat na batayan ang bawat proyektong isinasama sa pambansang badyet at sertipikahang kayang ipatupad. Bahagi rin aniya ito ng patuloy na paglilinis sa ahensiya at pagtanggal sa mga opisyal na nasasangkot sa umano’y iregularidad.
- Latest
