Mayor Joy sa mga barangay officials: Flood control projects, i-report

MANILA, Philippines — Hiniling ni Quezon City Mayor Joy Belmonte ang tulong ng mga barangay officials na report sa QC LGU ang mga flood control projects sa kani kanilang lugar.

Nabatid na nakipagpulong si Belmonte sa mga barangay chairman ng iba’t ibang distrito bilang bahagi ng pagsisiyasat sa mga flood control projects sa lungsod.

Dito’y iniutos ni Belmonte ang mas matibay na pakikipag-ugnayan ng mga barangay sa pamahalaang lungsod, partikular sa pagtukoy ng mga flood control projects na isinagawa ng DPWH sa kani-kanilang lugar.

Bahagi ito ng nagpapatuloy na flood control audit ng lungsod, kung saan lahat ng nakalap na datos ay isusumite sa mga itinalagang ahensiya ng Pangulo upang imbestigahan ang isyu ng flood control projects.

Inanunsyo din ni Belmonte na nagpahatid ng suporta at tulong ang MMDA at SMC President Ramon Ang para sa pagpapatupad ng ilang bahagi ng QC Drainage Masterplan kabilang dito ang pagpapagawa ng mga rainwater catch basin, at dredging sa mga ilog.