Miyembro ng gun-for-hire, todas sa shootout
MANILA, Philippines — Todas ang isang hired killer na sangkot sa iba’t ibang kaso ng murder makaraang makipagbarilan sa mga awtoridad sa isinagawang anti-criminality operation sa Quezon City, kahapon ng madaling araw.
Kinilala ni QCPD director P/Chief Supt. Joselito Esquivel Jr., ang napatay na suspek na si Frederick Dela Cerna, alyas “DekDek’’, 30, ng Brgy. Bahay Toro, Quezon City.
Ayon kay P/Supt. Alex Alberto, dakong alas- 4:10 ng madaling araw ay nagsagawa ng anti-criminality patrol operation ang kanyang mga tauhan nang makita nila ang isang grupo ng mga lalaki na nag-iinuman sa kalsada Sitio Incinerator, Brgy. Bahay Toro.
Sinita ng mga awtoridad ang mga ito pero nagpulasan ng takbo sa iba’t ibang direksiyon at nagpaputok ng baril.
Hinabol ng mga pulis hanggang ma-korner si Dela Cerna na pumasok sa isang tahanan .
Kinumbinsi ng mga awtoridad na sumuko si Dela Cerna dahil napalibutan na ito pero nagmatigas ang suspect at nanlaban pa ito na nagresulta ng kanyang kamatayan.
Nakuha ng pulisya sa suspek ang 3 sachet ng shabu, 1 sachet ng marijuana, drug paraphernalia, at isang 9MM na baril na may 8 bala.
Sa rekord ng pulisya, nabatid na si Dela Cerna ay isang ‘gun for hire’ na may iba’t-ibang warrant of arrest na kasong murder.
- Latest