Obrero, utas sa resbak ng ginulping ‘kawatan’
MANILA, Philippines — Patay ang isang obrero matapos na resbakan at pagsasaksakin ng isang lalaki na una umano niyang ginulpi noong nakaraang buwan dahil sa pagkakasangkot sa kasong pagnanakaw sa Tondo, Manila.
Kaagad na binawian ng buhay si Jester Mullet, 24, construction worker, at residente ng Permanent Housing, Balut, Tondo, Manila dahil sa mga tama ng saksak sa iba’t ibang bahagi ng katawan.
Tinutugis na ng mga awtoridad ang suspek na si Alexander Banzuelo, residente rin ng naturang lugar.
Sa ulat ng Manila Police District (MPD)-Homicide Section, alas-5:54 ng hapon noong Mayo 19 nang maganap ang krimen sa Building 24 ng Permanent Housing, sa Balut, Tondo. Habang naglalakad ang biktima sa naturang lugar nang bigla na lang sumulpot ang suspek at mula sa likuran ay ilang ulit siyang pinagsasaksak bago mabilis na tumakas.
Lumitaw sa pagsisiyasat na ang motibo sa krimen ay nag-ugat sa insidenteng naganap noong Abril, kung saan binugbog ng biktima ang suspek matapos na masangkot sa nakawan sa kanilang lugar.
Bago umano umalis ang suspek ay binantaan pa nito ang biktima na papatayin kapag nagkaroon siya ng pagkakataon.
- Latest
