‘Akyat bahay’ nahulog sa ninakawang bahay, timbog

MANILA, Philippines -  Nahuli ng mga nagrorondang tanod ang isang miyembro ng ‘‘Akyat Bahay Gang’’ nang mahulog mula sa ikalawang palapag ng kanyang ninakawang bahay sa Quezon City, kahapon ng  madaling araw.

Bali ang magkabilang binti ng kawatan na si Ha-rold Ancero, 25, residente ng Makabayan St., Brgy.  Obrero sa lungsod.

Sinasabing halos hindi makalakad si Ancero nang mahuli  ng mga rumorondang tanod sa inakyat nitong bahay sa Parkway Street Brgy. Obrero Quezon City.

Ayon kay Melanie Florendo ang may-ari ng niloobang bahay naalimpungatan siya sa gitna ng mahimbing na pagtulog at nakita na lamang ang suspek sa loob ng kanilang kwarto.

Dahil sa malakas na pagsigaw ni Florendo kayat nataranta ang magnanakaw at nadulas sa terrace at kasamang bumagsak sa sementadong daan ang ninakaw na Samsung Experia cellphone na nagkakahalaga ng P15,000.