3 cybersex den sa QC ni-raid: 21 katao arestado

MANILA, Philippines - Nasa 21 kalalakihan ang inaresto ng mga tauhan ng QC Police District-Anti Cyber Crime Group nang salakayin ang tatlong cybersex dens sa naturang lungsod kamakalawa ng gabi hanggang kahapon ng madaling araw.

Ayon kay QCPD director, Police Chief Superintendent Guillermo Eleazar sinalakay ang naturang cybersex dens matapos makatanggap ng impormasyon mula sa confidential informant. Ito umano ay pinapatakbo ng isang Mark Bocaya, alyas Kram Pudoy, Paul James Rivera Malapitan a.k.a P.J na may business name na Kanluran Contact Solution Inc. sa 3rd Floor, ng No. 185 Ilocos Sur Street, Brgy. Sto. Cristo, QC; 8th Floor, Room 11, One Executive Bldg.,# 5 West Avenue, Brgy. Nayong Kaunlaran; at Room 304, Prince Jun Condominium at No. 42 Timog Avenue, Diliman,QC.  

Sinalakay ang mga naturang cybersex dens sa bisa ng search warrant na inisyu ng Quezon City Regio­nal Trial Court.

Nabatid sa ulat na sa unang search warrant na isinilbi ng Quezon City Police sa 3rd. Floor ng No. 185 Ilocos Sur Street, Brgy. Sto Cristo kung saan dinakip ang 11 kalalakihan na nakikipag-chat at nahuli sa akto habang nagbebenta umano ng mga pornographic material online.

Nakumpiska ng mga pulis  ang 15 computer, 1 Arris Modem, 1 D-Link Router, 11 assorted cellphones, at 2 Western Union receipts.

Habang sampung sus­pek ang inaresto sa 8th Floor, Room 11, One Executive Bldg., sa No. 5 West Avenue, Brgy. Nayong Kaunlaran

Kung saan nasamsam dito  ang sampung computer, 6 na computer monitors, 1 router, 1 modern, 1 switch hub at 1 casing.

Wala naman nadakip sa Room 304, Prince Jun Condominium sa No. 42 Timog Ave­nue at kinumpiska ang may 22 computers, six computer monitors, 1 casing, 1 router, 1 modem at 1 switch hub.

Nahaharap ang mga suspek sa kasong paglabag sa Sec 4 (c) (1) of Re­public Act 10175 (The Cybercrime Prevention Act of 2012) habang ang mga nakumpiskang software ay sasailalim sa exa­mination.